TechCrunch-ı bəlkə də çoxlarınız tanıyırsınız. Dünyanın ən böyük texnologiya və startap medialarından biridir. Hansı ki, daha dəqiq desək, aylıq 17 milyondan çox unikal ziyarətçisi olan və keçən il 22,5 milyon dollar gəlir əldə edən dünya nəhəngi bir şirkətdən söhbət gedir.
TechCrunch tərəfindən keçirilən TechCrunch Disrupt tədbiri də texnologiya dünyasındakı ən son tendensiyaları və yenilikləri müzakirə etmək üçün hər il dünyanın müxtəlif yerindən sahibkarları, investorları və jurnalistləri bir araya gətirir. Bu il ölkəmiz adına ən qürurverici amil isə, Azərbaycanın beynəlxalq səviyyəli bu tədbirdə, ABŞ-ın 7-dən 77-ə hamının eşitdiyi San-Fransisko ştatında, elə məhz adı ilə böyük hərflərlə “Azerbaijan” yazılmış pavilyonunun olmasıdır. TechCrunch Disrupt öz sahəsində dünyanın aparıcı, nüfuzlu tədbirlərindəndir. Həmçinin “TechCrunch Disrupt 2023” dünyanın ən böyük startap tədbiri hesab olunur. Bu əlamətdar tədbirdə iştirak həm də Azərbaycanın qüruru üçün əlamətdar hadisədir.
TechCrunch Disrupt dünya miqyasında texnologiya sənayesində aparıcı tədbirlərdən biri kimi öz nüfuzunu həmişə qoruyur. Qlobal miqyasda ən böyük startap tədbiri hesab edilən dünyanın müxtəlif yerlərindən ən parlaq ağılları və perspektivli startapları cəlb edir. Tədbirdə Recepta, E-Legal, Senpex, Voiceloft və.s kimi startaplar çıxış edirlər. Məqsəd onların qlobal bazara çıxışını təmin etməkdir. Qeyd edək ki, Azərbaycanlı startaplardan əlavə ️İnnovasiya və Rəqəmsal İnkişaf Agentliyinin rəhbəri İnarə Vəliyevanın da tədbir timsalında çıxışı baş tutub. Eyni zamanda “PASHA Holding”-in sponsoru olduğu Azərbaycan pavilyonunda “PASHA Holding”-in innovasiyalar proqramının rəhbəri Fərrux Əli başda olmaqla, digər nümayəndələrlə birgə geniş heyət iştirak etmişdir.
Xatırladaq ki, The International MeetUp tədbirindəki Startup Battle qalibi olan 3 ən yaxşı startapın da məhz Techcrunch Disrupt üçün ABŞ Roadshow-a gəlməsi “PASHA Holding” sponsorluğu ilə baş tutmuşdur.
Ölkəmizin həssas vaxtlarını yaşadığı bu günlərdə, vətəndən 11.000 Km uzaqda belə ölkəmizə ABŞ kimi bir mühitdə dəyər qata biliriksə, deməli hər cəbhədə olduğu kimi texnologiya cəbhəsində də nailiyyətlərimiz uğurla nəticələnir. Bu nailiyyətlər təkcə Azərbaycanın texnoloji tərəqqisini deyil, həm də beynəlxalq arenada parlamaq qabiliyyətimizi vurğulayır. Amerikada belə ölkəmizin tanınması və qlobal texnoloji sahədə iz qoyması ölkənin texnologiya sahəsindəki cəsarəti və uğurları haqqında çox şey deməkdir.
