Microsoft şirkətinin ən önəmli rəhbərlərindən biri olan Panos Panay 20 illik kariyerasını sonlandırıb. Belə ki, Windows və Surface rəhbəri Panay 20 ildən sonra doğma şirkəti olan Microsoft-u tərk edir. Qeyd edək ki, Panos Microsoft şirkətində uzunmüddət fərqli sahələr üzrə çalışmışdır. Hətta şirkətin baş məhsul direktoru vəzifəsinə qədər yüksələn Panos təəccüblü qərarla uğurlu kariyerasını sonlandırıb. Microsoft şirkətinin istehlak marketinq rəhbəri olan Yusif Mehdi onun vəzifəsini icra edəcək. Maraqlısı budur ki, Panos hazırda şirkətin ən son məhsulu olan Windows 11 sisteminin inkişafına rəhbərlik edirdi.
Windows və Surface rəhbəri olan Panos sosial media hesabında bildirib ki, təxminən 20 illik uğurlu kariyeradan sonra şirkəti tərk edir. O, həyatında yeni dövrə başlamaq istədiyini bildirib. Lakin bu açıqlama həvəskarlarını yetərincə qane etməyib. Xatırladaq ki, o 2004-cü ildə şirkətə proqram meneceri olaraq qatılıb. Nəhayət 14 il sonra o, şirkətn ilk hibrid noutbuklarının hazırlanmasına rəhbərlik etdikdən sonra Baş Məhsul Direktoru vəzifəsinə təyin edilib. 2021-ci ildə isə Panosun kariyerası daha da yüksəlib. Belə ki, o Windows 11 əməliyyat sisteminin uğurla istifadəyə verilməsindən sonra vitse-prezident kimi vəzifəsinə davam edib. Məhz bu qərardan sonra o, Microsoft şirkətinin ən vacib adlarından birinə çevrilib.
İndi isə o, 21 Sentyabrda baş tutacaq tədbirdən sadəcə bir neçə gün əvvəlcə qəflətən öz kariyerasını bitirməyi qərara alıb. Qeyd edək ki, şirkət bir neçə gün sonra Windows və Bing-də yeni süni intellekt xüsusiyyətlərini elan etməyi planlaşdırır. Həmçinin Windows 12 əməliyyat sisteminin də artıq inkişaf mərhələsində olduğu hərkəsə məlumdur. Təəssüf ki, Panos bu dəfə yeni Windows əməliyyat sistemini hazırlanmasına iştirak etməyəcək. Bunun yeni əməliyyat sisteminə nə qədər təsir edəcəyi isə hələlik məlum deyil.
