Ölkəmizdə və dünyada ən populyar sosial şəbəkələrdən biri olan, habelə bir çox ölkə tərəfindən qadağan edilən TikTok Avropada 345 milyon avro cərimə ödəyəcək. Belə ki, İrlandiya Məlumatların Qorunması Komissiyası tərəfindən, sosial media cərimələnib. Əsas səbəb isə uşaqların və digər istifadəçilərin məlumatlarının TikTok tərəfindən toplanması olub.
Ümumiyyətlə TikTok şəbəkəsi son dövrlərdə milyonlarla istifadəçi qazanıb. Lakin eyni zamanda hər il TikTok sosial mediasının qaydaları pozduğu da ortaya çıxır. İndi isə TikTok uşaqların məlumatlarını topladığı üçün Avropada 345 milyon avro yəni 368 milyon dollar cərimə ödəyəcək. Xatırladaq ki, aprel ayında İngiltərə Məlumat Tənzimləmə Təşkilatı tərəfindən sosial media nəhəngi uşaqların məlumatlarını qeyri-qanuni topladığına görə 12.7 milyon funt sterlinq cərimələnmişdi. Hətta bu sosial media nəhənginin ən böyük məbləğli cərimələrindən biri idi. Görünən odur kİ, bu cərimələrdən nəticə çıxarmayan TikTok hələdə bildiyini etməyə davam edib. Yekunda isə İrlandiya Məlumatların Qorunması Komissiyasının qəzəbinə tuş gəlib və rekord məbləğdə cərimə olunub.
Maraqlısı budur ki, ötən dəfələrdə də sosial media nəhəngi oxşar səbəbdən cərimələnib. Belə ki, uşaq hesablarını TikTok ictimai edir. Məhz bu səbəbdən onların profillərinə və videolarına hərkəs sərbəst olaraq daxil ola bilir. Təbii ki, bu uşaqları ciddi təhlükəyə atır. Ümumiyyətlə bu gün bir çox sosial media da xüsusilə Instagramda uşaqlar üçün xüsusi qaydalar var. Hətta Instagram uşaq hesablarının valideynləri tərəfindən nəzarət olunmasına şərait yaradır. Onu da qeyd edək ki, TikTok bu cərimələrlə razılaşmır. Çünki sosial media nəhənginin avropa üzrə məsul şəxsinə görə TikTok 2021-ci ilin sentyabr ayından etibarən 13-15 yaşlı uşaqlar üçün birbaşa mesajlaşmanın deaktiv edildiyini bildirir.
