Texnologiya sahəsi artıq bambaşqa səviyyəyə keçir. Belə ki, bir çox smartfon istehsalçısı qatlanan ekranlardan uzanan ekranlar keçid edir. Hətta ötən aylarda Samsung brendi Flex Hybrid OLED adlı ekranını təqdim etmişdi. Bu ekranın ən mühüm xüsusiyyəti isə həm uzanan, həm də qatlanan olması idi. İndi isə Tecno brendi uzanan ekrana sahib olan yeni flaqman Phantom Ultimate modelini təqdim edib. Hələ konsept mərhələsində olan yeni modelin kütləvi istehsala keçib-keçməyəcəyi isə hələlik məlum deyil.
Son zamanlar ölkəmizdə dişli rəqibə çevrilən Tecno yeni Phantom Ultimate ilə bütün diqqətləri öz üzərinə cəlb edə bilib. Uzana bilən ekran bütün istifadəçiləri valeh edib. Smartfon normal halda 6.55 düymlük AMOLED ekrana sahib olsa da 7.11 düym-ə qədər uzana bilir. Hətta smartfonun ekranın uzanması üçün sadəcə bir düyməyə basmaq kifayət edir. Always On Display funksiyasına sahib olan cihazın ekranı 2.296×1596 piksel təsvir ölçüsünə sahibdir. Həmçinin 338 ppi piksel sıxlığına malik olan ekran paneli keyfiyyətli ekran təcrübəsi təklif edir. Tecno bildirir ki, smartfonu bir əllə asanlıqla tutmaq mümkündür. Hətta brend məhz bu idea üzərində xüsusilə işləyib. Bunun üçün smartfonun arxa hissəsinə sürtünməni artıra bilən qapaq əlavə edilib. Ekranın sarıldığı yeri isə tecno şüşə panel ilə mühafizə edir.
Hələ konsept mərhələsində olan bu model qatlanan bilən ekranlı smartfonlar üçün bazarda dişli rəqib olacaq. Lakin hələ də smartfonun bəzi məhdudiyyətləri mövcuddur. Onlardan ən birincisi isə davamlılıqdır. Uzanan ekran texnologiyası hələlik yeni olduğuna görə onun bir çox mənfi xüsusiyyətləri aradan qaldırılmayıb.
