Avropa gün keçdikcə internet qaydalarını dəyişməyə davam edir. Belə ki, bu dəfə Avropa Birliyi yeni Rəqəmsal Xidmətlər Aktı ilə sosial media platformalarında istifadəçilərin şəxsi məlumatlarının təhlükəsizliyini artırmağa çalışır. Məhz bu məqsədlə Rəqəmsal Xidmətlər aktı və ya DSA qəbul edilib, hətta qüvvəyə minib. Ümumiyyətlə bu gün milyonlarla insan sosial şəbəkədən istifadə edir. Təbii ki, bu platformalarda insanların şəxsi məlumatları oğurlana bilir və ya onların hüquqları pozula bilir. İndi isə Avropa Birliyi vətəndaşların hüquqlarının pozulmasının qarşısını almaq üçün yeni qanun hazırlayıb.
Avropada qüvvəyə minən yeni Rəqəmsal Xidmətlər Aktı Facebook, TikTok, Google və digər sosial media platformalarının fəaliyyətini tənzimləyəcək. Bundan sonra bütün platformalar dərc edilən bütün məzmunlara ciddi nəzarət edəcək. İstifadəçilərin təhlükəsizliyini təmin etmək üçün yaradılan qanuna əsasən bütün nifrət və təhqir tərkibli məzmunlar platformalarda qadağan ediləcək. Habelə soyqırım, intihar və digər zərərli məzmunlara da nəzarət olunacaq. Maraqlısı budur ki, yeni akta görə qeyd edilən tələblərə əməl etməyən şirkətlər qlobal gəlirlərinin 6%-i məbləğində yəni milyardlarla dollar məbləğində cərimə ilə üzləşəcək və onların Avropa Birliyindəki fəaliyyətləri məhdudlaşdırılacaq.
Beləliklə yeni qanun AliExpress, Amazon, Apple AppStore, Booking.com kimi məşhur platofrmalar daxil olmaqla, Facebook, YouTube, TikTok, X və digərlərinə təsir edəcək. Hətta yeni qanuna əsasən Wikipedia istifadəçi şərtlərində dəyişiklik edir. Artıq bütün məzmunlara ciddi nəzarət olunacaq və şübhəli məzmunlar dərhal silinəcək. Yeni qanun Avropa Birliyində qəbul edilsə də, qlobalda da öz təsirini kifayət qədər göstərəcək.
