Texnologiya sahəsində etdiyi inqilabi yenilikləri ilə tanınan Samsung brendi bu dəfə də çərçivəsiz ekran paneli hazırlayır. Ümumiyyətlə bu gün ekran gövdə-nisbəti ilə bir çox smartfon modelləri müqayisə olunur. Texnologiya nəhəngləri bu nisbəti minimuma endirməyə çalışır. Təbii ki, Samsung brendinin də əsas hədəflərindən biri məhz bu nisbətin 0-a endirilməsidir. Görünən odur ki, şirkət məqsədinə çatmaq üçün işə qoyulub.
Samsung şirkət çərçivəsiz ekran paneli hazırlamaqla yanaşı bir çox yeniliklər üzərində də çalışır. Belə ki, ötən gün şirkət rəsmi olaraq qatlana bilən planşet və noutbuk hazırladağını təsdiqləmişdi. Həmçinin texnologiya nəhənginin 440MP kamera sensoru hazırladığı da artıq məlumdur. İndi isə şirkət daha böyük çılğınlıq edərək, heç bir çərçivəyə sahib olmayan OLED ekran paneli hazırlamaq istəyir. Bu gün Samsung Display şirkəti mobil cihazlar üçün OLED panel istehsal edən ən böyük təchizatçıdır. Hətta şirkətin panelləri bazarda olan bir çox flaqman smartfonda o cümlədən iPhone modellərində istifadə olunur.
Lakin Samsung bütün bu uğurlarla yetinmək niyyətində deyil. Texnologiya nəhəngi bir çox istehsalçının etməyə çalışdığı çərçivəsiz ekran paneli hazırlamaq istəyir. Çərçivəsiz ekran paneli bir çoxları üçün müəyyən qədər imkansız görünür. Çünkü ekran panelləri minimum həddə olsa belə müəyyən gövdəyə yəni çərçivəyə sahib olmalıdır ki, smartfonların üzərinə quraşdırılsın. Hətta Samsung daha əvvəl Edge modellərində ekran-gövdə nisbətini minimuma endirmək üçün smartfonların ekranlarını qıvrımlı etmişdi. İndi isə şirkət 3D laminasiya texnologiyalarından istifadə edərək All Around Full Screen panellərini hazırlamaq istəyir.
