Tesla şirkətinin hazırladığı elektromobillərin ən sevilən tərəfi proqram təminatına verilən dəstəyin zəngin olmasıdır. Hər hansı bir Tesla modelini əldə etdikdən sonra smartfon işlədirmiş kimi yeniləmələr alırsınız. Üstəlik bu yeniləmələr hər dəfə bir-birindən maraqlı xüsusiyyətlər gətirir. Xüsusiyyətlər bəzən əyləncə xarakterli olsa da çox vaxt birbaşa idarə etmə keyfiyyətini artıracaq detalları da özündə birləşdirir. Sürücünün rahatlığı, təhlükəsizliyi tipli nüansların yaxşılaşdırılması üçün şirkət daim yeni addımlar atır. Bir neçə gün əvvəl Tesla tərəfindən verilən məlumata görə, avtomobillər havaya görə yürüyüş məsafəsi hesablaya biləcəklər.
Havaya görə yürüyüş məsafəsi hesablanarkən rütubət, külək və temperatur hallar nəzərə alınacaq
Elektromobil istifadə edən biri üçün batareyasının nə qədər məsafə qət edə biləcəyini dəqiqliklə bilməsi vacibdir. Bəzi elektromobil istehsalçıları bunu müəyyən alqoritmlər vasitəsilə təqribi olaraq sürücüyə çatdıra bilir. Lakin Tesla şirkəti yürüyüş məsafəsi barədə sürücüyə daha doğru məlumat vermək üçün proqram təminatını daim inkişaf etdirir. Tesla mühəndisləri bu işi təkmilləşdirərək elə bir səviyyəyə çatdırıb ki, bundan sonra Tesla modellərində havaya görə yürüyüş məsafəsi hesablanması mümkün olacaq. Havadakı rütubət, külək və temperaturun real zamanda hesablanaraq yürüyüş məsafəsinə necə təsir edəcəyi məlumat ekranında göstəriləcək. Hətta küləyin avtomobilə hansı istiqamətdən əsdiyi də təyin ediləcək. Çünki, elektromobillər üçün aerodinamik təsirlər çox vacibdir. Magistralda qarşınız boşdursa həmin boş yolda getmək əvəzinə məsələn, avtobus kimi geniş bir nəqliyyat vasitəsinin arxasında getsəniz havanı qarşıdakı nəqliyyat vasitəsi yardığı üçün ordan da əlavə yürüyüş məsafəsi əldə edə bilirsiniz.
İndiyə qədər Tesla modellərinin yürüyüş məsafəsini hesablamaqda istifadə edilən faktorlar daha sadə idi. Xəritə məlumatlarına əsasən gedəcəyiniz məsafə, eniş-yoxuşlar, təkərin tipi və eyni zamanda sürüş stiliniz, kondisioner işlədilməsi kimi hallar toplanaraq məsafə təxmin edilirdi. Əslində bunların hamısını hələ ki, bəzi rəqib markalar təqdim etmir. Ona görə Tesla bir addım daha öndədir. Havaya görə yürüyüş məsafəsi hesablanması ilə bağlı gələn yenilikdən əlavə, hava ilə bağlı fərqli bir yenilik də var. Əgər avtomobilin pəncərəsini və.s açıq qoyub getmisinizsə və yağış yağırsa, avtomatik olaraq avtomobil bunu təsbit edəcək. Açıq olan pəncərələriniz avtomatik bağlanacaq.
