Prosessor dedikdə ilk ağla gələn brendlərdən biri olan Intel gələcəkdə bütün prosessorlara süni intellekt dəstəyi əlavə etməyi planlaşdırır. Belə ki, şirkətin bu ilin 2-ci rübü üçün olan maliyyə hesabatları barədə danışarkən baş icraçı direktor olan Pat Gelsinger gələcəkdə istehsal edəcəkləri hər şeyə süni intellekt dəstəyi əlavə edəcəklərini bildirib. Beləliklə direktor şirkətin gələcək planları ilə bağlı investorları məlumatlandırıb. Bildiyimiz kimi, Intel şirkəti uzunmüddətdir Meteor Lake seriyalı prosessorlar üzərində işləyir. Şirkətin planlarına uyğun olaraq yeni təqdim ediləcək bu prosessorlar süni intellekt dəstəyinə sahib olacaq.
Ötən günlərdə isə Ryzen 7000X3D seriyasına rəqib olacaq Intel Raptor Lake Refresh prosessorlarının buraxılış tarixi dəqiqləşmişdi. Belə ki, Intel yeni flaqman prosessorlarını 2023-cü ilin sonuna qədər təqdim edəcək. Beləliklə Intel şirkətinin bütün prosessorlara süni intellekt dəstəyi əlavə etmək planı ortaya çıxdıqdan sonra ağıllara tək bir sual gəlir. 14-cü nəsil Intel Raptor Lake Refresh prosessorları süni intellekt dəstəyinə sahib olacaqmı? Görünən odur ki, Intel bu prosessorlara da süni intellekt dəstəyi əlavə etməyə hazırlaşır. Yəni şirkətin tək süni intellekt əsaslı prosessoru yalnız Meteor Lake olmayacaq.
Bundan əlavə qeyd edək ki, Microsoft şirkəti də payızda təqdim etməyi planlaşdırdığı Windows 12 əməliyyat sisteminə süni intellekt dəstəyi əlavə edəcək. Beləliklə süni intellekt texnologiyaları kompüterlərin əsas hissələrindən birinə çevriləcək. Hətta gələcəkdə süni intellekt əsaslı bir çox ehtiyat hisssəsi də təqdim edilə bilər.
