Apple iPhone 8 seriyasından başlayaraq smartfonlarda şüşə korpuslarda istifadə etməyə başlamışdı. Belə ki, bu şüşə örtüklər bəzən dizayn cəhətdən mükəmməl görünsə də, cızıqlara və zərbələrə qarşı həssasdır. Hətta bununla bağlı Apple brendi bəzi yeniliklər də etməyə çalışıb. İndi isə Apple iPhone modellərini gələcəkdə cızıqlara daha davamlı edəcək yeni patent alıb. Ümumiyyətlə yalnız iPhone deyil bütün smartfon istifadəçilərinin qorxusu məhz ekranların və şüşə örtüklərin cızılması və ya çartlamasıdır. Məhz bu səbəbdən istifadəçilər öz smartfonlarını qoruyucu örtüklər və ya telefon qabları ilə qorumağa çalışırlar.
Apple isə istifadəçilərin bu qorxusunu tamamilə ortadan qaldırmaq istəyir. AppleInsider mənbəsi bildirir ki, texnologiya nəhəngi ABŞ Ticarət Markası Patent İdarəsinə (USPTO) patent almaq üçün müraciət edib. Bu patent isə iPhone modellərini cızıqlara qarşı daha davamlı edəcək. Apple müxtəlif maddələri birləşdirərək iPhone modellərini təkmilləşdirmək istəyir. Apple bildirir ki, hər bir materialın özünə görə mənfi və müsbət cəhətləri mövcuddur.
Məsələn metal korpus əzilmələrə, cızılmalara, qırılmalara və əyilmələrə qarşı davamlıdır. Plastik isə əyilmələrə, qırılmalara qarşı daha uyğun olsa da cızıqlara qarşı dayanıqsızdır. Ümumiyyətlə bütün materialları birləşdirərək eyni smartfonda istifadə etmək həmin smartfonun cızılmalara, qırılmalara və digər təhlükələrə qarşı daha dayanıqlı olmasına səbəb olur. Məhz bu səbəbdən də Apple yeni patenti məhz müxtəlif maddələri birləşdirmək üçün alır. Bütün maddələr öz müsbət cəhətlərini eyni bir məqsəd üçün birləşdirəcək. Lakin Apple bunu etmək üçün bütün materialları və ya maddələri 10-100 mikron arasında yerləşdirməlidir. Hələlik brendin bunu necə bacaracağı barədə məlumat yoxdur.
