İlin ən böyük texnologiya tədbirlərindən biri olan WWDC23 tədbirində Apple şirkəti yeni və innovativ texnologiyaları ilə hərkəsi valeh etmişdi. Belə ki, ən çox diqqət çəkən modellərdən biri olan Apple Vision Pro modelinin yeni ekran xüsusiyyətləri də açıqlanıb. Qeyd edək ki, VR sektorunu kökündən silkələyən qarışıq reallıq eynəyi təkcə Apple üçün deyil, həm də bütün AR/VR bazarı üçün böyük əhəmiyyət kəsb edən model kimi çıxış etmişdi. Hətta Vision Pro, dizayn baxımından ilk dəfə baxdığımızda gözləniləndən xeyli zərif təəssürat bağışlamışdı.
Yeni Apple Vision Pro indiyə qədər yaradılmış ən keyfiyyətli displeyə malikdir
Qeyd edək ki, Apple brendinin ilk qarışıq reallıq eynəyi olan Vision Pro inanılmaz yüksək keyfiyyətli micro-OLED ekran panelinə malikdir. Belə ki, ekran paneli 23 milyon piksel ilə təchiz edilib. Bu ekran 5000 nit ekran parlaqlığına və 4000 ppi piksel sıxlığına malikdir. Bu isə o deməkdir ki, Vision Pro bu sahənin ən yaxşısıdır. Lakin bu gün məlum olub ki, Apple şirkəti piksel sıxlığını 3400 ppi-a endirib. Maraqlısı budur ki, bu fərq heç hiss olunmur. Məhsulu sınayanlar onun çox keyfiyyətli ekrana sahib olduğunu bildirir. Bundan əlavə yeni qarışıq reallıq eynəyinin ekranı 90 Hz yenilənmə tezliyinə sahibdir. Əslində bu bəzi istifadəçilər üçün məyusedicidir. Çünki, bazarda mövcud olan bir çox model artıq 120 Hz yenilənmə tezliyində çalışır. Lakin bir məqam mövcuddur ki, bu eynəyin ekran keyfiyyəti texnologiya sahəsinin ən yaxşı ekranıdır.
Beləliklə deyə bilərik ki, Apple Vision Pro modelini 3499 dollar edən məhz möhtəşəm ekran keyfiyyəti və alüminium gövdəsidir. Bundan əlavə cihaz bir çox kamera sensoru ilə də təchiz edilib. Belə ki, modelin ön tərəfində 2 ədəd, yan tərəfində 2 ədəd və aşağı tərəfində 4 ədəd kamera sensoru mövcuddur. Lidar və FaceID dəstəkləyən TrueDepth kamera sistemi qarışıq reallıq modelinin bahalı edən xüsusiyyətlərdəndir. Həmçinin cihaz öz gücünü Apple imzalı M2 prosessorundan alır. Sensorlar üçün isə ayrı Apple imzalı R1 sensoru quraşdırılıb. Vision Pro gələn ilin əvvəlindən əlçatan olacaq. Təəssüf ki, Vision Pro yalnız ABŞ-da Apple pərakəndə satış mağazalarında satışa çıxarılacaq.
