Apple şirkəti yaxın günlərdə baş tutacaq tədbir çərçivəsində hər il olduğu kimi ötən ilin satışları ilə bağlı məlumat verəcək. Məhz bu məqsəd ilə şirkət ötən il App Store tətbiqində nə qədər satış olduğu barədə araşdırma edib. Məlum olub ki, texnologiya nəhəngi olan Apple ötən il App Store mağazasında nə az nə çox 1.1 trilyon dəyərində satış həyata keçirib. Qeyd edək ki, bu göstərici 2021-ci il ilə müqayisədə 29% daha çoxdur. Tədqiqatçılar App Store tətbiqinin bütün ekosistemini əhatə edən araşdırma çərçivəsində bütün tətbiq satışlarından əldə olunan məbləğlər, tətbiq içi satışlar və sairə detalları da nəzərə alıb.
Ümumiyyətlə göstəricilərə görə pandemiyadan sonra səyahətlərin sayı çoxaldığı üçün nəqliyyat vasitələri, taksi və digər səyahət tətbiqlərindən əldə olunan gəlir artıb. Belə ki, 2021-ci il ilə müqayisədə ötən il bu tərz tətbiqlərin satışı 84% artıb. Lakin qida və market tətbiqləri də App Store mağazasında ən sürətli böyüyən kateqoriyalardandır. Belə ki, son 3 il ərzində bu kateqoriyadakı satışlar təxminən 3 dəfə artıb. Araşdırmaya görə App Store mağazasının 1 trilyon dollar dəyərində olan satışı aşağıdakı kateqoriyalar üzrədir:
- Ümumi pərakəndə – 621 milyard dollar
- Səyahət – 102 milyard dollar
- Qida – 77 milyard dollar
- Məhsullar – 52 milyard dollar
- Nəqliyyat – 48 milyard dollar
- Rəqəmsal ödənişlər – 10 milyard dollar
- Tətbiqdaxili reklamlar – 109 milyard dollar
Ümumiyyətlə Apple şirkəti App Store mağazasında 1 trilyon dollarlıq satışı əldə etmək üçün müxtəlif strategiyalardan istifadə edib. Belə ki, ilk növbədə texnologiya nəhəngi rəqəmsal məhsulları və tətbiqləri ödənişsiz olaraq təklif edir. Daha sonra isə abunə yolu ilə tətbiqlərdən istifadəyə davam edə biləcəyinizi bildirir. İstifadəçilər müəyyən müddət istifadə etdikləri və bəyəndikləri tətbiqi App Store mağazasında pul verərək əldə edir. Bundan əlavə şirkət reklamlardan da ciddi məbləğdə gəlir əldə edir.
