Brüssel şəhərində yerləşən Avropa Avtomobil İstehsalçıları Birliyi yeni Euro 7 standartları barədə açıqlama verib. Belə ki, yeni standartlar gözləniləndən daha olacaq. Avropa Birliyi daxili yanma mühərrikli avtomobillərə yeni standartlar ilə daha bir zərbə vurub. Beləliklə yeni standartlar 2025-ci ildə ilk öncə minik avtomobillərinə tətbiq olunacaq. Daha sonra isə növbə avtobus və daha ağır yük avtomobillərinə çatacaq. Açıqlamada qeyd olunur ki, yeni standartların xərci Avropa Birliyi Komissiyasının gözlədiyi məbləğdən daha baha olacaq. Bu isə gələcəkdə daxili yanma mühərriki ilə təchiz edilmiş avtomobillərin istehsal qiymətinin bahalaşacağından xəbər verir.
Yeni Euro 7 standartları ilə minik avtomobilləri və mikroavtobuslar təxminən 2 min avro bahalaşacaq. Dizel mühərrikli yük maşınları və avtobuslar da isə bu qiymət 12 min avro olacaq. Qeyd edək ki, Avropa Birliyi Komissiyası bu qiymətlərin minik avtomobilləri üçün 180-450 avro aralığında olacağını gözləyirdi. Həmçinin komissiya yük maşınları üçün əlavə 2800 avro qiymət təyin ediləcəyini düşünürdü. Lakin yeni ortaya çıxan qiymətlər gözləniləndən 5-6 dəfə daha baha olub. Bununla da deyə bilərik ki, gələcəkdə avropada istehsal olunacaq məşhur brendlərin avtomobilləri daha baha qiymətə təklif olunacaq. Hətta bu qiymət dəyişikliyi ölkəmizdəki avtomobil bazarına da öz təsirini göstərəcək.
Ümumiyyətlə Euro 7 standartları avtomobillərin istehsal etdiyi zərərli qazların və hissəciklərin azaldılmasını nəzərdə tutur. Lakin bunu etmək üçün avtomobil brendləri istehsalda müəyyən dəyişiklik etməlidir. Məhz bu səbəbdən də istehsal xərcləri artır. Yekun olaraq deyə bilərik ki, yeni standartlar elektromobillərə olan tələbatı bir qədər də artıracaq. Ətraf mühitə zərərsiz və daha ucuz qiymətə təklif edilən elektrikli avtomobillər qısa müddətdə daxili yanma mühərrikli avtomobillərdən daha çox satıla bilər.
