Tesla şirkətinin baş icraçı direktoru və qurucusu Elon Musk elan edib ki, Tesla şirkəti ən bahalı avtopilot funksiyasınl 1 ay ərzində pulsuz təklif edəcək. Belə ki, Elon Musk öz Twitter hesabında bildirib ki, şirkət yeni tam avtonom sürüş sistemi olan FSD funksiyasını bir təqvim ayı ərzində pulsuz istifadəyə verəcək. Xatırladaq ki, Tesla şirkəti uzun müddətdir FSD funksiyası üzərində çalışırdı. Hətta bununla bağlı bəzi videolar da yayılmışdı. Şirkət yeni funksiyasını Beta versiyada sınaqdan da keçirmişdi. İstifadəçilərin həyəcanına səbəb olan yeni tam avtonom sürüş sistemi hərkəsin istifadə etməsi, sınaması üçün 1 ay ərzində pulsuz olaraq təklif ediləcək.
Tesla şirkətinin yeni FSD yəni Full Self-Driving funksiyası möhtəşəm olsa da, hələlik Şimali Amerikada əlçatan olacaq. Buna səbəb isə funksiyanın amerikadakı yollara uyğun olaraq hazırlanmasıdır. Yəni yollar, yol nişanları və qaydalar məhz amerikaya uyğun hazırlanıb. Bu səbəbdən də Tesla şirkəti yeni avtopilot funksiyasını yalnız Amerikada 1 ay ərzində pulsuz təklif edəcək. Elon Musk xüsusilə bildirir ki, Tesla yeni funksiyanı geniş miqyasda təklif etmədən əvvəl onu dünya standartlarına uyğun vəziyyətə gətirəcək. Ona görə 1 aylıq testlər, adətən bütün Tesla modelləri ilə nəhəng bir test mühitini, dataları özündə birləşdirəcək. Yaxın vaxtlarda isə FSD böyük bir ehtimalla requlyasiyalara uyğun olmaqla bütün dünya üçün əlçatan vəziyyətə gələcək. Ona görə də milyarder yeni funksiyanın tamamilə qüsursuz və problemsiz fəaliyyət göstərməsini istəyir.
Qeyd edək ki, Elon Musk Tesla şirkətinin yeni avtopilot versiyasını nə zaman pulsuz olaraq təklif edəcəyini bildirməyib. Lakin insayderlər Beta versiyasında olan funksiyanın artıq tamamlandığını və yaxın günlərdə Şimali Amerikada yaşayan istifadəçilərə təklif edəcəyini iddia edir. Tesla şirkətinin yesni tam avtonok sürüş avtopilotu üçün Tesla almaq istəyən şəxslər əlavə olaraq 15 min dollar ödəməlidir.
