Bu il yeni Pixel 8 seriyasını təqdim etməyə hazırlaşan Google öz səhvindən dərs çıxararaq yeni Tensor çipsetlərini təkmilləşdirməyi planlayır. Texnologiya nəhənginin yeni Tensor G3 çipsetinin çox məhsuldar olacağı gözlənilir. Qeyd edək ki, ötən günlərdə Revengus ləqəbli insayder bu prosessorun bəzi xüsusiyyətlərini də ortaya çıxarmışdı. İndi isə eyni adlı insayder iddia edir ki, texnologiya nəhəngi Tensor G3 prosessorunda etdiyi səhvi anlayaraq, gələcək prosessorlarını təkmilləşdirməyə çoxdan başlayıb. Belə ki, Tensor G4 və Tensor G5 çipsetlərinin TSMC şirkətinin 4nm və 3nm texnoloji prosesi ilə təqdim ediləcəyi gözlənilir. Yəni, şirkət artıq TSMC yolunda addımlara başlayıb.
Xatırladaq ki, ötən günlərdə Tensor G3 çipsetinin 1 ədəd 3.30 GHz Cortex-X3 nüvəsindən, 4 ədəd 2.60 GHz Cortex-A715 nüvəsindən və 4 ədəd 2.60 GHz Cortex-A510 nüvəsindən ibarət 9 nüvəli konfiqurasiya ilə təklif olunacağı ortaya çıxmışdı. Revengus ləqəbli insayder ötən gün yeni Google Tensor G4 prosessorunun TSMC tərəfindən 4 nm standartında istehsal ediləcəyini iddia edib. Tensor G5 prosessorunun isə TSMC tərəfindən 3nm standartında istehsal ediləcəyi gözlənilir. Görünən odur ki, texnologiya nəhəngi Tensor G3 prosessorunun Snapdragon 8 Gen 3 çipsetindən daha zəif olduğunu çoxdan anlayıb və prosessorlarını daha da təkmilləşdirmək qərarına gəlib.
Google prosessorlarını nə qədər təkmilləşdirsə də Apple şirkətindən geri qalacaq. Çünki, Apple bu il A17 Bionic prosessorunu 3nm standartında təqdim edə bilər. Bununla da Google hələ 2 il yəni Tensor G5 çipsetini təqdim edənə qədər Apple şirkətindən geri qalacaq. Maraqlısı budur ki, yeni Google Tensor G4 prosessorları Google şirkətinin özü tərəfindən biləvasitə hazırlanacaq. Bu halın prosessorların performansını nə qədər dəyişəcəyi naməlumdur. Çünki, bu vaxta qədər çipsetlər Samsung mühəndisləri ilə əməkdaşlıq çərçivəsində ərsəyə gəlirdi.
