Möhtəşəm Teknofest tədbirinin birinci günü başa çatdı. Teknofest festivalının nə olduğu barədə hələ də məlumatlı deyilsinizsə, qısaca bu barədə sizi məlumat verək. Azərbaycanın birinci dəfə 2021-ci ildən ev sahibliyi etdiyi Teknofest 2018-ci ildə T3 Fondu və Türkiyə Respublikasının Sənaye və Texnologiya Nazirliyi tərəfindən yaradılıb. Festivalın əsasını yeni texnologiyalar, aviasiya və kosmos sahəsindən olan innovativ yeniliklər təşkil edir. Tedroid Media olaraq biz də bu gün festivalda öz yerimizi aldıq. Açılış vaxtından etibarən festivalda iştirak etmək istəyib, iştirak edə bilməyən hər kəs üçün Instagram hekayələrimiz vastiəsilə adətən onlayn “gəzinti” yaşatmağa çalışdıq. Festivalda növbəti günlərdə baş verən yeniliklər barədə də xəbərdar olmaq üçün bizi sosial şəbəkələrdən izləyə bilərsiniz. İndi isə, bu gün baş verənlər barədə müəyyən qədər məlumat verək.
Teknofest festivalının ilk günü nələr baş verdi
Festival saat 10:00-da start götürdü. Girişdən içəri girdikdə insanların diqqətini özünə çəkən ilk şey Renault markalı avtomobil üzərində göstərilən qəza simulyasiyası idi. Qəza zamanı yuvarlanan avtomobildə təhlükəsizlik kəmərinin nə dərəcədə əhəmiyyətli olduğu göstərilirdi. Biraz qabağa irəlilədikdə FHN tərəfindən nümayiş etdirilən “Defender” robotlarını görə bilərdiniz. Sonra isə sıra ilə çadırlar, yəni əsas sərgi hissəsi başlayırdı. Bir-bir festivaldakı layihələrlə şirkətlər və layihələri ilə tanış olmağa başladıq. Sırf texnologiya sahəsində marağımızı cəlb edən ilk şey yeni nəsil Synap əməliyyat sistemi ilə işləyən süni intellekt əsaslı pilotsuz və avtonom uçuş aparatları oldu. Biraz irəlilədikdən sonra İmprotex İndustries şirkətinə aid xüsusilə müasir yanğın söndürmə texnolgiyaları ilə tanış olmaq mümkün idi.
Bu hissədə musiqili yürüyüş başladı və insanlar yavaş-yavaş əsas meydançaya doğru hərəkətə başladılar. Biraz sonra Türkiyənin iki nüfuzlu, tanınmış şəxsinin çıxışını dinləyəcəkdik. Biz isə nitq başlayana qədər yürüyüşdən biraz uzaqlaşaraq festival iştirakçıları ilə tanış olmağa davam etdik.
Robotzade Azərbaycan-ın robotika məhsullarına baxa bilərdiniz. Hansı ki, dron materialları, arduino dəstləri, sensorlar və bəzi avadanlıqlar nümayiş edilirdi. Növbəti dayanacağımız Azərcell şirkətinin sərgisi oldu. Azərcell bu sərgidə dünyagörüşünüzdən istifadə etməklə hədiyyə qazana biləcəyiniz oyun hazırlamışdı. Eyni zamanda Azərcell ağıllı şəhər layihəsi ilə tanış ola bilərdiniz. Festivalda Smartpoint adlı şirkət 18 kvadrat metr suda 100 kVt enerji istehsal etməyin mümkün olduğu enerji texnologiyasını göstərirdi. Azərbaycanda ağıllı ev sistemlərinin yerli istehsalçısı Elsmart da iştirak edirdi. Təmassız ödəmə texnologiyasında ən innovativ həllərdən biri olan Sima, festivalda insanlara yeniliyi daha yaxından göstərmə fürsəti əldə etmişdi.
Günorta saatlarına yaxınlaşdıqca Selçuk Bayraktar öz nitqi ilə festivala daha çox maraq qatdı. Selçuk Bayraktarın çıxışından sonra Türkiyə Respublikasının Sənaye və Texnologiya naziri Mustafa Varank öz nitqini söylədi. Bunları dinlədik və festivaldakı digər sərgilənən layihələrlə tanış olmağa geri qayıtdıq.
Baykar istehsalı pilotsuz uçuş aparatları da festivalda göstərilirdi. PUA-larla həm yerdə, həm havada uçarkən tanış olmaq imkanı yaradılmışdı. Hətta Bayraktar TB2 ilə bağlı detalların xırda-xırda göstərildiyi, simulatorun olduğu bölgə belə sıranın sonlarına doğru yerləşdirilmişdi. BP şirkəti yaşıl enerji ilə bağlı yeniliklərini təqdim edirdi. AMEA öz uçuş aparatlarını və digər yüksək texnologiyalarını sərgiləyirdi. Maraqlıdır ki, SOCAR da mavi hidrogen texnologiyasına, sanki yenilənən enerjiyə diqqət çəkirdi. SOCAR şirkətinə aid PUA müdafiə sistemləri festivala gətirilmişdi. STEAM Azərbaycan isə uşaqların sağlamlığını (temperatur və.s) öyrənmək üçün bağça kimi yerlərə quraşdırılacaq cihazı və kimi uşaqlar əsas seçilərək hazırlanmış IKT avadanlıqlarını tanıdırdı. Azərbaycan hava yolları da yüksək keyfiyyətli PUA-larını sərgiyə çıxarmışdı. İdrak Texnoloji Transfer şirkəti möhtəşəm ağıllı nəqliyyat layihələrinə sahib idi. Buna ağıllı işıqfor, ağllı dayanacaq, ağıllı avtobus, avtomatlaşdırılmış sərhəd keçid kompleksi və.s nümunə ola bilər. EGOV Azərbaycan süni intellektlə işləyən interaktiv layihələrini təqdim edirdi. Aviasiya sektorunda tanınmış Tei Tusas şirkəti kompleks mühərrik nümunələrini nümayişə çıxarmışdı. Roketsan və Aselsan da festivalda iştirak edirdi. Hər biri maraqlı texnoloji həllər təqdim edirdilər.
Festivalda olan əksər maraqlı hissələr barədə məlumat verməyi bitirəndə, “solo türk” ilk uçuşu ilə qulaqlarımızın illərlə unutmayacağı, xatirəmizdən heç vaxt silinməyəcək uçuşları ilə yadda qaldı. Bundan əvvəl “Türk Yıldızları“-nın uçuşları da baş tutmuşdu və onlar da öz möhtəşəmliyi ilə yadda qalmışdı. Axşamüstü uçuşlar yenə təkrarlandı. 18:00-dan etibarən konsert proqramı başladı və saatlar 21:30 göstərdiyi vaxtda lazer şousu ilə birlikdə festivalın ilk günü başa çatdı.
