Uzun müddətdir haqqında iddialar irəli sürülən Xiaomi MIX 5 modeli nəhayət ortaya çıxdı. Belə ki, cihazın əslində 2022-ci ildə təqdim edilməsi planlaşdırılsa da, naməlum səbəblərdən təqdimat ləğv edilmişdi. Bu gün ortaya çıxan konsept görüntü cihazın bu il təqdim ediləcəyinin xəbərçisi ola bilər. Qeyd edək ki, yeni MIX 5 modelinə aid olan nümunəvi görüntü Weibo səhifəsində DCS (Digital Chat Station) tərəfindən sızdırılıb. Sızdırılan görüntüyə əsasən qeyd etmək olar ki, Xiaomi yeni modeldə simmetrik qutu çərçivəli dizaynı və ekranın altına quraşdırılmış kamera ilə ənənəvi dizayndan biraz kənara çıxıb. Maraqlısı odur ki, yeni model Red Magic 8 Pro modelinə çox oxşayır.
Xiaomi MIX 5 hansı xüsusiyyətlərə malik olacaq?
DCS mənbəsi tərəfindən Weibo səhifəsinə sızdırılan canlı görüntüyə əsasən qeyd etmək olar ki, Xiaomi MIX 5 olduqca yaxşı sistem ilə təchiz ediləcək. Belə ki, cihazın 6.73 düymlük AMOLED ekran paneli 3200x1440p təsvir ölçüsünə malik ola bilər. Bundan əlavə isə görüntüdə cihazın Snapdragon 8 Gen 2 SoC prosessoru ilə təchiz ediləcəyi görünür. Həmçinin cihazın 12 GB operativ yaddaş və 256 GB daxili yaddaş ilə təchiz ediləcəyi gözlənilir. Batareya tərəfində isə cihaz 4820 mAs batareya həcminə sahib olacaq. Çox güman ki, cihaz sürətli şarj xüsusiyyətini dəstəkləyəcək. Hətta uzun müddətdir ki, cihazın 200 vatt sürətli şarj xüsusiyyətinə sahib olacağı iddia olunur. Məhz bu parametrlərə əsaslanaraq deyə bilərik ki, yeni model kifayət qədər performanslı olacaq.
Əlavə olaraq qeyd edək ki, Xiaomi MIX 5 modelinin kameradan çox mükəmməl istifadəçi təcrübəsinə fokuslanacağı deyilir. Arxa tərəfdə isə smartfon LEICA tərəfindən təkmilləşdirilmiş 50 MP OIS sensoru, 48 MP ultra geniş-bucaqlı kamera sensoru və 48 MP 2x optik zoom sensoru ilə təchiz ediləcəyi iddia olunur. Əgər bu iddialar reallaşarsa smartfon yalnız sistem tərəfində deyil kamera tərəfində də yüksək performans göstərə bilər. Lakin kamera xüsusiyyətləri barədə hələlik heç bir məlumat yoxdur.
