South China Morning Post bazar ertəsi Çin ordusu üçün texnologiya üzərində işləyən alimlər qrupuna istinadən xəbər verir ki, Çin ordusu süni intellekt ilə işləyən uzunmənzilli artilleriya qurğularını uğurla sınaqdan keçirib. Bunun vasitəsi ilə onları daha yüksək atəş dəqiqliyi və daha az döyüş xərcləri gözləyir.
Xəbərdə, Çin mütəxəssisləri keçən iyul ayında apardıqları çoxsaylı sınaqlarda lazerlə idarə olunan süni intellekt dəstəkli artilleriya qurğusunun 16 kilometr (10 mil) məsafədəki insan böyüklüyündəki hədəfləri vura bildiyi və gözləntiləri aşdığı bildirilib. Mütəxəssislər bu texnologiyanın potensial olaraq müharibə xərclərini azaldacağını ifadə ediblər.
Ənənəvi artilleriya sistemlərinin təxminən 100 metr (328 fut) xəta payına sahib olduğunu bildirən qəzet, müasir artilleriya sistemlərinin də külək və hava istiliyi kimi bir sıra real vaxt parametrlərinin ölçülməsini tələb etdiyi üçün məhdud vuruş nisbətlərinə malik olduğunu qeyd edib. Bu da atəş zamanı nəzərə alınır. Qeyd olunur ki, süni intellekt sistemləri lazımi hesablamaları sürətləndirərək daha yaxşı vuruş dərəcəsini təmin edir.
Hesabata görə, Çin və ABŞ hazırda müharibə xərclərini azaltmaq üçün “ağıllı toplar”-ın hazırlanmasında rəqabət aparır və diqqəti daha bahalı raketlərdən daha çox mərmi istehsalına yönəldir. Martın sonunda aparıcı kompüter alimləri və texnoloji sahibkarlar, o cümlədən Elon Musk və Apple şirkətinin həmtəsisçisi Steve Wozniak müasir süni intellekt texnologiyalarının inkişafı və istifadəsini tənzimləyən normaları müəyyən etmək üçün ən azı altı ay müddətinə süni intellekt sistemlərinin təliminə dərhal fasilə verməyə çağırıblar. Onlar bu çağırışları ilə açıq məktub imzaladılar. Məktub artan ictimai həyəcan və ChatGPT və digər AI chatbotları tərəfindən nümayiş etdirilən artan süni intellekt imkanları ilə bağlı narahatlıq fonunda dərc edilib.
