Ötən gün baş tutan sosial media hesabları üzərindən anonslarla birlikdə Xiaomi şirkəti orta seqment üçün nəzərdə tutulmuş Redmi Note 12 seriyasını təqdim etdi. Redmi Note 12 seriyası da əslində, bizim üçün çox sürpriz olmadı. Cihazlar elə əvvəlcədən təxmin edildiyi kimi idi və 4 model qarşımıza çıxdı. Uyğun olaraq Redmi Note 12 Pro+ 5G, Redmi Note 12 Pro 5G, Redmi Note 12 5G və Redmi Note 12 modelləri ilkin mərhələdə satışa çıxarılacaq. Redmi Note 12S və Redmi Note 12 Pro 4G modellərinin olmadığını düşünsək də sonradan verilən məlumata görə, həmin cihazlar da yaxın vaxtlarda satışda olacaq. Lakin sonradan çıxarılacaqları üçün bu dəfə 4 vacib model arasına daxil deyillər.
Redmi Note 12 seriyası nə vəd edir?
İndi isə Redmi Note 12 seriyası modellərinin texniki xüsusiyyətlərinə nəzər salaq. Redmi Note 12 Pro+ modelindən başlasaq bu cihaz tam texniki xüsusiyyətləri nəzərən Çində çıxmış Redmi Note 12 Pro+ ilə eynidir. Redmi Note 12 Pro+ modeli sahib olduğu detallar hesabına seriyanın ən güclü nümayəndəsi hesab edilir. Smartfon öz gücünü Dimensity 1080 çipsetindən alır. OIS ilə gücləndirilmiş 200MP Samsung ISOCELL HPX əsas, 8MP ultra geniş, 2MP makro kamerasına malikdir. 6.67 düymlük 120Hz tezlikli DolbyVision sertifikatına malik Flow AMOLED ekran paneli ilə təchiz edilib. 5000 mAs həcmli batareyası 120 vatt sürətli şarj dəstəkləyir. Baxın, çoxlarınız 210 vatt olacağını gözləyəcəyindən vurğulamaq istərdik ki, bu cihazın qlobal variantında 210 vatt sürətli şarj dəstəyi yoxdur. 210 vatt sürətli şarj dəstəkləyən model kimi Discovery Edition qlobal bazara çıxarılmalı idi. Bu isə baş tutmayıb.
Redmi Note 12 Pro modelində isə detallar cüzi dəyişiklikləri ilə fərqlənir. Bu dəyişikliklər isə özünü əsas kameranın 50MP IMX766 ilə əvəzlənməsi və eyni həcmli batareyanın 67 vatt sürətli şarj dəstəkləməsi cəhətdən göstərir. OIS stabilizatoru ilə gücləndirmə isə üst modeldə olduğu kimi qorunub.
Redmi Note 12 5G və Redmi Note 12 modelləri isə nisbətən daha aşağı büdcə üçün hazırlanmış cihazlardırlar. Redmi Note 12 5G modelində Snapdragon 4 Gen 1 çipseti işlənərkən, sadə Redmi Note 12 modelində Snapdragon 685 çipsetini görürük. Hər iki cihazda 120Hz tezlikli 6.67 düymlük AMOLED ekran paneli işlədilib. Redmi Note 12 5G modelində 48MP əsas kamera, Redmi Note 12 sadə modelində 50MP təsvir ölçülü sensorla əvəzlənib. Cihazların 5000 mAs həcmli batareyası 33 vatt şarj dəstəkləyir.
Ümumilikdə 4 cihaz da MIUI 14 interfeysi ilə qutudan çıxır. IP53 sertifikatı ilə su sıçramaları və toza qarşı dayanıqlıdırlar. Redmi Note 12 seriyası ilə bağlı ən maraqlı detallar isə cihazların qiyməti tərəfindədir. Lakin bizim üçün bu qiymətlər biraz mənasızdır. Əksər hallarda Avropa qiymətləri Azərbaycan bazarındakı qiymətləri təxmin etməkdə yanlış vasitə olur.
Redmi Note 12 seriyasının qiyməti
Seriyanın ən baha modeli Redmi Note 12 Pro+ 5G olub 8-256GB başlanğıc variantında 499€ istənilir. Redmi Note 12 Pro modeli üçün 8-128GB başlanğıc variantı 399€, Redmi Note 12 5G üçün 299€, Redmi Note 12 4G üçün isə 4-128GB başlanğıc variantı 229€ təşkil edir.
