Microsoft Edge brauzerinə GPT-4 ilə işləyən çatbot qoyduqdan bir neçə həftə sonra Opera da eyni yeniliyi gətirir. Opera-nın ChatGPT-ni brauzerinə inteqrasiya etmək istədiyini bilirdik. İndi isə belə görünür ki, Opera brauzerlərinə təkcə ChatGPT əlavə etməyib, həm də dərin süni intellekt inteqrasiyasını təmin edib.
Belə ki, ChatGPT və ChatSonic süni intellekt çatbotları artıq Opera və Opera GX yan menyusuna inteqrasiya olunub. Siz bu paneldən alətlərə tez daxil olub, istədiyiniz sorğunu yerinə yetirə bilərsiniz. Şirkət həmçinin vurğulayır ki, bu yeni alətlər bütün masaüstü platformalarda erkən girişdə mövcuddur. Bu vaxt, ChatGPT mətndən-mətnə çıxış təklif edir, ChatSonic isə OpenAI-nin ən son GPT-4 modeli ilə birlikdə şəkil daxiletmələrini qəbul edə bilər.
Təqdim olunan ən böyük xüsusiyyət “AI Prompts” adlanır. İstənilən vebsaytda, məzmunda və ya məqalədə seçdiyiniz söz və ya bütün xəbər AI Prompts ilə ümumiləşdirilə və ya təfərrüatlandırıla bilər. Yəni, yazıda nədən bəhs edildiyi süni intellekt qısaca sizə izah edir. Bundan əlavə, seçdiyiniz məqalə haqqında paylaşmağa hazır tvit və ya paylaşım mətni hazırlanır. Hətta əlaqəli məzmundan “meme” yazıları da yaradıla bilər.
Opera həmçinin deyir ki, hazırda özünün GPT əsaslı süni intellekt modeli üzərində işləyir və gələcəkdə brauzerlərinə daha çox süni intellektlə işləyən funksiyalar təqdim edəcək. Generativ AI-nin populyarlığını nəzərə alsaq, daha çox brauzerin buna əməl edəcəyi ehtimalı var. Microsoft bu sahədə hələlik açıq üstünlüyə malikdir. Həm Edge brauzeri, həm də Bing əvvəldən ən qabaqcıl GPT-4 modelindən istifadə edir. OpenAI-a böyük sərmayə qoyduqdan sonra Microsoft, şirkətin süni intellekt texnologiyalarını demək olar ki, bütün xidmətlərinə gətirməklə inteqrasiya olunmuş ekosistem yaradır.
