Oyun smartfonları bazarı ötən ildən başlayaraq ciddi şəkildə daralmağa davam edir. Tələbin aşağı olması, oyun smartfonlarına yüksək pul verməyin qarşılığında mobil oyunların çox az olması kimi bir çox faktor artıq bu tip cihazların istehsalını mənasız edir. İnsanlar eyni qiymətə smartfon kimi işlətməyə daha uyğun cihazlar axtarırlar. Normal olan da fikrimizcə elə budur. Bəzi oyun smartfonu istehsal edən brendlər ana şirkətlərinin hesabına ayaqda qalsa da, ana şirkətləri çox böyük qaynaq ayırmayan brendlər yavaş-yavaş yox olmağın astanasındadır. Belə ki, iddialara görə Lenovo şirkəti oyun smartfonlarını ləğv edən ilk brendlərdən biri olacaq. Şirkət daxilindəki bir işçinin sosial media hesabı üzərindən paylaşdığı məlumata əsasən, Legion seriyası oyun smartfonları artıq istehsal edilməyəcək.
Legion oyun smartfonları çəkilən xərclərin qarşılığını ödəmir
Şirkətin ən son 2022-ci ilin avqust ayında təqdim etdiyi cihazı Snapdragon 8+ Gen 1 çipseti ilə təchiz edilmiş Legion Y70 modeli idi. Oyun smartfonu kimi olduqca keyfiyyətli, hətta fanlı bir fiziki soyutma sistemi ilə gücləndirilmiş cihaz yenə də istənilən satış ədədlərinə çatmadı. Ona görə də şirkət iddialar doğrudursa, Legion seriyası oyun smartfonları istehsalını tərk edəcək. Əslində, Lenovo şirkətinin əlində bu gün xeyli qloballaşmış Motorola seriyasının olduğunu nəzərə alsaq, şirkət artıq öz qüvvəsini smartfonlar tərəfindən elə Motorola üçün yönləndirə bilər.
Geridə isə, Xiaomi şirkətinin Black Shark, ASUS şirkətinin ROG Phone və Nubia şirkətinin Red Magic kimi oyun smartfonları qalır. Xiaomi şirkəti ötən il Black Shark brendində işçilərin 50%-lik geniş bir hissəsini işdən çıxartmışdı. Böyük bir ehtimalla eyni oyun smartfonlarını ləğv etmə trendi Xiaomi tərəfində də gözləniləndir və hətta bununla bağlı bəzi addımlar atılmışdı. Lakin şirkət son anda oyun smartfonları sahəsini tərk etməkdən yayındı. Böyük bir ehtimalla rəqiblərlə kiçik də olsa rəqabət üçün fikrindən daşınan şirkət bənzər prosesi yenidən başlada bilər.
