Carl Pei-nin “Nothing” texnologiya brendini təqdim edəndən bəri şirkət yalnız bir neçə məhsulunu təqdim edib. Bunlara Nothing Ear 1 TWS qulaqlıqları, ardınca Nothing Phone 1 və daha yeni Nothing Ear Stick qulaqlıqları daxildir. Nothing baş icraçı direktoru əvvəllər verdiyi müsahibədə Nothing Phone (2) modelinin tezliklə buraxılacağını və ABŞ-da da satışa çıxarılacağını rəsmiləşdirmişdi. İndi, isə Mobil Dünya Konqresi 2023-də (MWC 2023) nəhayət, qarşıdan gələn Phone 2 haqqında daha çox xəbər var. Yəni, çox keçmədən yaxın aylarda Nothing məhsulları ilə əlaqədar daha çox məlumatın çıxacağını gözləyə bilərik.
Belə ki, MWC 2023-də Carl Pei, Nothing şirkətinin yaxınlaşan smartfonu Nothing Phone (2)-nin “premium xüsusiyyəti” adlandırdığı yeniliyini elan etdi. Carl Pei və Qualcomm-un baş direktoru Cristiano Amon birlikdə çıxış edərək, Nothing Phone (2) modelinin Qualcomm çipseti ilə təchiz ediləcəyini və xüsusilə Qualcomm Snapdragon 8 Gen seriyası prosessor olacağını açıqladı. Hazırda bu məlumat xaricində cihazla bağlı mövcud olan heç bir şey yoxdur. Nothing Phone (1) smartfonu əsasən orta səviyyəli smartfonlarda tapılan Qualcomm Snapdragon 778G+ çipseti ilə təchiz edilmişdi.
Carl Pei son müsahibəsində qarşıdan gələn cihazın adını və şirkətin ABŞ bazarına üstünlük verəcəyini təsdiqləyib. Nothing Phone (1) ABŞ-da buraxılmadı, çünki brend sertifikatlaşdırma üzrə daşıyıcılarla işləməli idi, bu isə Nothing-in o vaxtkı resurslarına uyğun deyildi. Şirkət bu yaxınlarda ABŞ-da yaşayan alıcılar üçün telefonu ölkədə sınaqdan keçirməyə imkan verəcək beta proqramını da elan edib.
Hesabatda həmçinin iddia edilir ki, Nothing Phone (2) maksimum 120 Hz görüntü yeniləmə sürətinə malik AMOLED panelə sahib olacaq. Bu ekran adaptiv tezlikli olacaq, yəni ekrandakı məzmuna və ya tətbiqlərə əsasən yeniləmə sürətini tənzimləyəcək. Bu da cihaz premium seqmentə aid olacağını təsdiqləyən nümunlərdəndir.
