Samsung galaxy A34 və A54 modellərinin anons edilməsinə təqribi 2 həftə vaxt qalıb. Lakin insayderlər tərəfindən hər iki cihaz barədə detallar rəsmi render görüntüsünə qədər sızdırılmış vəziyyətdədir. Əvvəlcədən də cihazlar bizim üçün məlum olsa da gəlin, cihazlar barədə detallara yenidən nəzər yetirək və xüsusilə performans barədə detallara toxunaq. İlk olaraq Galaxy A54 çmodelindən danışmaqla başlasaq, Galaxy S23 seriyasını xatırladan dizayn üslubuna malik olacaq. Kamera modulları ayrı-ayrılıqda arxaya düzüləcək. Ön tərəfdə isə selfi kamerası “infinty-o” konespti ilə qalmağa davam edəcək.
Smartfon öz gücün bir neçə gün əvvəl anons edilmiş Exynos 1380 çipsetindən alacaq. Exynos 1380 çipseti 4 ədəd 2.4 GHz tezlikli Cortex-A78 nüvəsinə və 4 ədəd 2.0 GHz tezlikli Cortex-A55 nüvəsinə sahibdir. 5 nüvəli Mali-G68MP5 qrafik çipi ilə gücləndirilən bu çipset 5nm istehsal prosesinə sahibdir. Performans baxımından Geekbench 5.0 nəticələri Snapdragon 778G çipseti ilə olduqca yaxın, qrafik performansda isə biraz qabaqlama potensialı olan bir çipset Galaxy A54 modelində işlədilib.
Ekranın ölçüsü isə 0.1 düym kiçilərək 6.4 düymə düşəcək. Şirkətin bunu smartfonun gövdəsini kiçildərək, yoxsa ekranın çərçivələrini artıraraq etdiyi sual altındadır. Smartfonun kamera parametlərində də təkmilləşmə görəcəyik. İndiyə qədər orta seqment 64MP kamera sensorlarından istifadə edilsə də, Galaxy A54 modelində GN seriyası OIS ilə gücləndirilmiş 50MP əsaslı kamera konfiqurasiyası işlədiləcək. Digər kameralarımız isə 12MP ultra-geniş bucaqlı və 5MP makro sensorları kimi nəzərdə tutulub. Ön tərəfdəki 32MP kamera sensoru sabit qalacaq. 5000 mAs batareyası isə 25 vatt sürətli şarj dəstəkləməlidir.
Galaxy A34 modeli isə qəribə bir şəkildə Galaxy A54 modelindən daha böyük 6.6 düymlük ekran paneli ilə təchiz ediləcək. Lakin selfi kamerası yenə də çıxıntılı formada saxlanılır. Smartfonun arxa tərəfdən dizaynı Galaxy A54 ilə eynidir. Kamera performansı isə nisbətən zəif olacaq. Çünki, verilən məlumatda cihazın 48MP əsaslı üçlü kamera konfiqurasiyası ilə gücləndiriləcəyi deyilir.
Galaxy A54 modelindən fərqli olaraq Galaxy A34 modelində çipsetlə bağlı bəzi qəribə detallar var. İnsayderlər cihazın Dimensity 1080 ilə təchiz ediləcəyini deyirlər. Lakin Samsung Exynos 1330 çipsetini də Exynos 1380 ilə birlikdə anons etmişdi. Hansı ki, Exynos 1330 çipseti 5nm istehsal prosesi ilə hazırlanmış , 2.4 GHz tezlikli 2 ədəd Cortex-A78 nüvəsinə, 2 GHz tezlikdə işləyən 6 ədəd Cortex-A55 nüvəsinə sahibdir. Qrafik çipi isə Mali-G68 MP2 olub bir növ Galaxy A53 modelindəki Exynos 1280 çipseti üzərinə yeniləmədir.
Bu çipset varkən, Dimensity 1080 çipseti ilə Galaxy A34 modelinin anons edilməsi regiona görə çipset dəyişikliyi ediləcəyindən xəbər verə bilər. Mövzunu burada yekunlaşdırsaq, smartfonların təqdimatı ənənəvi qaydada 17 mart tarixinə gözlənilir. Ətraflı
