Galaxy S23 seriyası təqdim edildi! - Qiyməti

Samsung şirkəti bu gün keçirilən təqdimatda Galaxy S23 seriyası modellərini təqdim etdi. Belə ki, təqdimat tədbiri çərçivəsində həmişəki kimi 3 yeni model qarşımıza çıxdı. Aydın məsələdir söhbət Galaxy S23 Ultra, Galaxy S23+ və Galaxy S23 modellərindən gedir. İlk növbədə hamının gözlədiyi vacib bir detalı təsdiqləyərək mövzuya başlasaq, Galaxy S23 seriyası daxilində hər bir model illər sonra rəsmi olaraq ölkəmizə Qualcomm Snapdragon çipseti ilə gəlir. Yəni, seriya daxilində hər 3 model Snapdragon 8 Gen 2 çipsetinə malikdir. Galaxy S23 Ultra modeli 200MP kamerası və mükəmməl dizaynı ilə fərqlənərkən, Galaxy S23 modeli də dünyanın ən güclü kompakt smartfonu olmaqla önə çıxır. Ən optimal variant olaraq isə özünü əsl Galaxy S seriyası nümayəndəsi kimi göstərən Galaxy S23+ modelinə baxa bilərsiniz.

Galaxy S23 seriyasının dizaynı necə alınıb?

Ümumi əsas hissələrdən bəhs etdikdən sonra isə məqaləmizə Galaxy S23 seriyası barədə dizayndan danışmaqla davam etməliyik. Çünki, cihazlar, əslində müəyyən qədər Galaxy S22 seriyasını xatırladırlar. Lakin detallı nəzər yetirdikdə hər 3 cihazın gövdəsinin tamamilə dəyişdirildiyini görürük. Galaxy S23 Ultra modeli öz sələfi ilə müqayisədə düz kənarlara sahibdir. Smartfon nə qədər arxaya doğru bükülürmüş kimi görünsə də bu görünüş vizual olaraq sizi yanıltmasın. Samsung elə bir yeniləmə edib ki, smartfon həm qıvrımlı ekran, həm düz ekran sevənlər üçün ideal vəziyyətdədir. Bunun da səbəbi ekranın olduqca məntiqli şəkildə dizayn edilməsidir.

Samsung mühəndisləri ekran kənara doğru qıvrılmağa başlamaq istədikdə çərçivəni başladıblar. Yəni, qıvrım ekranın işlək hissəsinə yox, məhz qara rəngdə görünən kənar çərçivələr üzərinə düşüb. Qıvrım isə, bəlkə də qıvrım adlandırılmayacaq qədər azdır. Çünki, ekrana öndən baxdıqda bütün hüdudlarını tamamilə görmək mümkündür. Gövdənin düz kənarlara sahib olduğunu söyləmişdik. Gövdənin dizaynındakı tək dəyişiklik bu olmayıb, arxa tərəfdə kamera modulunun kənarlarına gövdə ilə ahəngdar rəngdə çərçivələr də əlavə olunub. Kamera modullarının ölçüsü də böyüyüb.

Galaxy S23+ və Galaxy S23 modelləri isə tamamilə yenilənmiş gövdə alıb. Gövdənin ucları Galaxy S23 seriyası ilə müqayisədə daha yuvarlaq olub. Eyni zamanda kənarlardan kamera moduluna doğru uzanan hissə ləğv edilib. Galaxy S23 seriyası daxilində hər bir model gövdədən ayrı-ayrılıqda kənara doğru uzanan kamera moduluna sahibdir. Qeyd edək ki, cihazların kənarları düz olsa da erqonomikliyin artırılması və əldə rahat olması üçün cüzi əyrilik verilib. Ön tərəfdə isə hər iki cihazda tamamilə düz, simmetrik çərçivəli ekran panelləri işlədilib.

Smartfonların performansı necə olacaq?

Samsung şirkətinin Galaxy S23 seriyası modellərinin hər birində Snapdragon 8 Gen 2 çipsetinin işlədildiyini qeyd etmişdik. Lakin Galaxy S23 seriyasında olan Snapdragon 8 Gen 2 çipseti Samsung şirkəti tərəfindən Qualcomm əməkdaşlığında yenidən işlənib. Yəni, digər cihazlardakı Snapdragon 8 Gen 2 ilə müqayisədə Galaxy S23 seriyasında 1 ədəd yüksək performanslı Cortex-X3 nüvəsinin tezliyi 3.19 GHz yox, 3.36 GHz tezliyə sazlanıb.

Samsung bu səbəbdən çipseti “Snapdragon 8 Gen 2 for Galaxy” devizi ilə anons edir. Geekbench testinə baxdıqda da bu üstünlüyü xüsusilə daha yaxşı termal soyutma texnologiyalarına malik Galaxy S23 Ultra modelində görmək olur. Çünki, eyni çipsetə malik Xiaomi 13 Pro modelinin geekbench testlərində Xiaomi 13 Pro modeli təkli nüvənin performansı nəzərən Galaxy S23 Ultra modelinin 1556 xallıq performansına çatmağı bacarmır. Üstəlik nəzər alsaq ki, Galaxy S23 seriyası hələ təqdimatdan əvvəlki proqram təminatı ilə ən ideal vəziyyətə sazlanmayıb və yeniləmələr alacaq, bu nəticə fikirmizcə çox yaxşıdır.

Tək fərq isə CPU tərəfində deyil, Samsung şirkəti Snapdragon 8 Gen 2 çipsetinin Adreno 740 qrafik çipini, yəni GPU-nu da naməlum tezlikdə sürət aşırdıb. Nəticədə yenə Xiaomi 13 Pro modeli ilə fərqlərinə baxdıqda Vulkan-da Galaxy S23 Ultra modeli öz rəqibi xeyli üstələyir. Maraqlı olacağından sadəcə qeyd edək ki, Galaxy S22 Ultra modelinin Snapdragon 8 Gen 1 variantlından ortalam 54% daha yüksək qrafik performansdan söhbət gedir. Aradakı fərq həqiqətən inanılmazdır.

galaxy s23 seriyası — Galaxy S23 modelləri

Samsung şirkəti çipseti bu cür xüsusiləşdirməklə mənim fikrimcə özünü Snapdragon 8+ Gen 2 çipsetindən sığortalayır. Nəticədə 4 ay sonra Snapdragon 8+ Gen 2 çıxacağı təqdirdə Galaxy S23 seriyası performans cəhətdən çox geri qalmayacaq. Hətta bəlkə də eyni nəticəyə malik olacaq.

Sonda qeyd edək ki, Galaxy S23 Ultra öz sələfindən 2.3 dəfə, Galaxy S23+ modeli 2.8 dəfə və Galaxy S23 modeli isə 1.6 dəfə daha böyük soyutma sisteminə sahibdir. Lakin öz aralarında müqayisə etdikdə Galaxy S23 Ultra modelində daha böyük ölçülü termal soyutma sistemi olduğundan digər 2 modeldən daha üstün nəticə göstərə bilir.

Galaxy S23 seriyası kamera cəhətdən hansı imkanlara malikdir?

Kamera parametrləri Galaxy S23 seriyası üçün ən maraqlı detallar arasındadır. Gəlin əvvəlcə kamera barədə detallar Galaxy S23 Ultra modeli barədə danışmaqla başlayaq. Samsung şirkəti 2 ildən çoxdur Galaxy S və hətta daha əvvəl Note seriyasında istifadə etdiyi 108MP HM seriyası kamera sensorlardan Galaxy S23 Ultra modelində imtina edir. Nəticədə Galaxy S22 Ultra modelindəki 108MP əsas kamera yeni Galaxy S23 Ultra modelində 1/1.3 düymlük ISOCELL HP2 200MP sensoru ilə əvəzlənib. Bu kamera eyni zamanda pikselləri birləşdirib 12MP və ya 50MP kimi davrana bilir. Bu da gecə çəkilişlərini təkmilləşdirir.

Əsas kameranın yanında 12MP Sony IMX564 120˚ ultra-geniş bucaqlı, 10MP Sony IMX754 3 qat optik yaxınlaşdırma dəstəkləyən telefoto və 10MP Sony IMX754 10 qat optik yaxınlaşdırma dəstəkləyən periskopik-telefoto kameraları mövcuddur. Ultra-geniş bucaqlı kamera istisna olmaqla hər bir kamera OIS ilə gücləndirilib və lazer avtofokus dəstəyi vardır.

Galaxy S23+ və Galaxy S23 modellərinin hər ikisində isə eyni kamera parametrləri mövcuddur. Cihazların əsas kamerası 1/1.56 düymlük ISOCELL GN5 50MP sensoru ilə gücləndirilib, əlavə olaraq 10MP 3 qat optik yaxınlaşdırma dəstəkli telefoto və 12MP 120˚ ultra-geniş bucaqlı kameralar mövcuddur. Təəssüf ki, sensorların özləri barədə sizlərlə bölüşə biləcəyimiz dəqiq bir informasiya yoxdur. Lakin böyük bir ehtimalla Galaxy S22 seriyası ilə birə-bir eyni kamera sensorları bu cihazlarda işlədilib. Bu cihazlarda da avtofokus və o cümlədən əsas, telefoto kameralarda olmaqla OIS mövcuddur.

galaxy s23 tedroid — Galaxy S23 modelləri

Ön tərəfdə isə bizləri hər 3 cihazda avtofokus dəstəkli ISOCELL 3LU 12MP selfi kamerası qarşılayır. Galaxy S23 seriyası xüsusilə gecə çəkilişlərində performans təkmilləşdirmələri almaqla çox keyfiyyətli nəticə ortaya qoyacaq. Video çəkilişlərində isə hər 3 cihazda ən üst limit 8K keyfiyyətdə 30FPS olaraq limitləndirilib. Lakin detallara çox girməyə dəyməz, çünki Samsung həqiqətən görüntülərdə təkmilləşmə əldə etmək üçün ciddi işlər görüb. Xüsusilə 4K HDR və süni intellekt təkmilləşdirmələri ilə görüntülərdə qumlanma, rənglərin korlanması kimi hallar əhəmiyyətli dərəcədə yaxşılaşıdırılıb.

Galaxy S23 seriyasının ekran və digər texniki xüsusiyyətləri barədə detallar nələrdir?

Galaxy S23 Ultra modelində 3088x1440p təsvir ölçülü və ya QHD+ adlandırdığımız 6.8 düymlük 1-120Hz arası adaptiv tezlikli Dynamic AMOLED 2X ekran paneli işlədilib. Ekranın gövdə nisbəti 90% təşkil edir. Uyğun olaraq Galaxy S23+ və Galaxy S23 modellərində texniki cəhətdən eyni, amma ölçü cəhətdən fərqli ekran panelləri mövcuddur. Belə ki, Galaxy S23+ modeli 6.6 düymlük Dynamic AMOLED 2X ekran panelinə sahib olarkən, sadə modeldə 6.1 düymlük ekran paneli işlədilib. iki ekran da 2340x1080p təsvir ölçüsünə, 48-120Hz arası adaptiv görüntü yeniləmə tezliyinə malikdir.

Bütün cihazların ön və arxa tərəfi Gorilla Glass Victus 2 ilə qorunur. Qeyd etmək lazımdır ki, Gorilla Glass Victus 2 ilə təchiz edilmiş ilk cihazlara məhz Galaxy S23 seriyası sahiblik edir. Gövdəsi alüminiumdan hazırlanmış cihazlar eyni zamanda IP68 sertifikatı ilə suya və toz qarşı dayanıqlıdırlar.

Batareya baxımından Galaxy S23 Ultra modelinin 5000 mAs həcmli batareyası 45 vatt sürətli şarj dəstəkləyir. Bu cihazda 10 vatt tərs və ya naqilsiz şarj dəstəyi mövcuddur. Galaxy S23+ modelində 4700 mAs həcmli batareya 45 vatt şarj dəstəkləyərkən, daha kompakt Galaxy S23 modelində 3900 mAs həcmli 25 vatt dəstəkli batareya işlədilib. Hər iki cihaz 10 vatt naqilsiz şarj dəstəkləməkdədirlər.