Motorola şirkəti ötən gün keçirdiyi təqdimatda 5 müxtəlif yeni modelini Moto G73, G53, G23, G13 və E13 təqdim etdi. Xüsusilə Moto G73 daha üstün xüsusiyyətləri ilə orta-üst seqment cihazlar arasında yer tutmağa hazırlaşarkən, digər cihazlar isə orta seqment üçün nəzərdə tutulublar. Gəlin elə ilk növbədə seriyanın giriş seqment modelləri danışmağa başlayaq.
Moto E13
Daha çox büdcə yönümlü smartfon olan və Android 13 Go versiyası ilə gələcək Moto E13 qiyməti 120 avroya təklif ediləcək. Standart olaraq 60Hz tezlikli 6.5 düymlük LCD ekran panelinə sahibdir. Arxa tərəfdə 13MP kamera sensoru işlədilib. 12nm texnoloji prosesə sahib Unisoc T606 çipseti ilə gücləndirilən cihaz 5000 mAs batareyaya malikdir. 10 Vatt doldurma dəstəkləyir. Bu cihaz xüsusilə minimum büdcə ilə “stock Android” təcrübəsində sadə imkanlar axtaranlar üçün uyğun görülür.
Qeyd etdiyimiz kimi Moto E13 modelinin başlanğıc qiyməti 120 avro təşkil edir.
Moto G23 və Moto G13
Moto G23 və Moto G13 modelləri 90Hz tezlikli 6,5 düymlük IPS LCD ekran panelindən istifadə edir. Cihazlar arasındakə texniki fərqlər inanılmaz dərəcədə azdır. Belə ki, hər iki cihaz öz gücünü Helio G85 çipsetindən alır. Hər iki cihaz 50MP təsvir ölçülü kamera əsas kamera ilə gücləndirilir.
Lakin digər kamera sensorlarında bəzi fərqlər vardır. Moto G23 modelində 5MP ultra geniş bucaqlı və 2MP makro kameraları quraşdırılarkən, G13 modelində 2MP makro və 2MP dərinlik sensorları mövcuddur. Ultra-geniş bucaqlı kamera daha zəif modeldə ləğv edilib. Selfi kamerası isə Moto G23 modelində 16MP təsvir ölçüsünə sahib olarkən, daha zəif modeldə 8MP kamera işlədilib. Hər iki cihazın gövdəsi eyni olduğundan 5000 mAs həcmli batareya ilə gücləndiriliblər. Lakin G23 modeli G13 ilə müqayisədə 30 vatt şarj dəstəyinə malikdir. G13 modelində bu dəyər 20 vatt olaraq qalıb. Bu modellər həmçinin Dolby Atmos dəstəkli stereo səs ucaldanlar və qulaqlıq girişi ilə təchiz olunub. Hər iki telefonda yaddaşın genişləndirilməsi üçün microSD yuvası var. Hər iki cihaz Android 13 ilə gələcək.
Moto G23 modelinin başlanğıc qiyməti 230 avro, Moto G13 modelinin isə qiyməti 180 avro təşkil edir.
Moto G53
Motorola Moto G53 modeli öz gücünü sələfindəki Snapdragon 680 ilə müqayisədə Snapdragon 480+ çipsetindən alır. Motorola brendi cihazı 5G bağlantısına sahib bir cihaza çevirmək üçün belə bir dəyişikliyə gedib. Eyni zamanda performans baxımından da Snapdragon 480+ çipseti Snapdragon 680 çipsetini qabaqlayır. Çipsetlərin adlandırılmasındakı rəqəmlər sizi yanıltmasın. Çünki, Snapdragon 680 çipseti adlandırmada üstün tərəf kimi görünsə də sahib olduğu arxitektura köhnə olduğu üçün performans baxımından müəyyən qədər geri qalır.
Smartfon 120Hz görüntü yeniləmə tezliyinə malik 6.5 düymlük IPS LCD ekran paneli ilə təchiz edilib. 50MP əsas, 2MP makro, 8MP selfi kamerası mövcuddur. 5000 mAs batareyası 10 vatt şarj dəstəkləyir. Bu cihaz da Dolby Atmos dəstəkli stereo səs ucalanlar və qulaqlıq girişi ilə təchiz olunub. İkinci SIM yerinə 1TB həcmli microSD taxıb yaddaş həcmini artırmaq mümkündür.
Moto G53 modelinin başlanğıc qiyməti 250 avro təşkil edir.
Moto G73
Moto G73 modeli, MediaTek şirkətinin Dimensity 930 ilə təhciz olunub. Qəribə bir fakt var ki, Motorola şirkəti Moto G72 modelində 6.6 düymlük FHD+ təsvir ölçülü 120Hz P-OLED ekran paneli işlədilərkən, yenilənmiş Moto G73 modelində 6.5 düymlük 120Hz tezlikli FHD+ təsvir ölçüsünə malik IPS LCD ekran paneli quraşdırılıb. Anladığımız qədərilə şirkət ekran panelini zəiflədərək Helio G99 çipsetini Dimensity 930 ilə əvəzləyib.
Məhz bu hissədə Dimensity 930 barədə məlumat verməkdə fayda var. Çünki, Dimensity 920 çipsetinin davamçısı kimi Dimensity 930 yox, məhz Dimensity 1080 çıxış edir. Nəticədə Dimensity 930 çipseti Dimensity 920 ilə müqayisədə daha aşağı nüvə tezliyinə, o cümlədən Mali-G68 MC4 yerinə IMG BXM-8-256 qrafik çipinə sahibdir. Performans baxımından Dimensity 920 ilə eyni və ya cüzi yüksək performans göstərir.
108MP əsas, o cümlədən 8MP ultra-geniş kameraya sahibdir. Ultra-geniş kamera eyni zamanda makro kamera funksiyasını yerinə yetirir. 5000 mAs batareyası 30 vatt sürətli şarj dəstəkləyir. Dolby Atmos dəstəkli stereo səs ucalanlar və qulaqlıq girişi ilə təchiz olunub.
Nəhayət Moto G73 modelinin başlanğıc qiyməti isə 300 avrodur.
