OpenAI tərəfindən hazırlanmış ChatGPT süni intellektini artıq bilməyən qalmayıb və son bir neçə aydır dünyanın gündəmindən düşmür. İndi isə Mate Marschalko adlı proqramçı GPT-3 ilə Apple şirkətinə aid olan Siri səsli köməkçisini birləşdirərək ortaya necə ev cihazlarının çıxa biləcəyini nümayiş etdirdi. Mate Marschalko ortaya çıxan nəticəni Reddit hesabında paylaşıb.
Son dərəcə uğurlu bir model olaraq görülən ChatGPT-nin səsli köməkçi ilə birləşməsi olduqca maraqlı nəticələr nümayiş etdirir. Məsələn, videoda “Mən bu videonu ofisdə qaranlıqda çəkdiyimi indicə başa düşdüm, bununla bağlı bir şey edə bilərsənmi?” sualına süni intellekt işıqlarını yandıraraq cavab verir. Başqa bir misalda, Marschalko yaratdığı texnologiyadan yataq otağında “daha yaxşı yatmağıma kömək edəcək” temperatur təyin etməyi xahiş edir, köməkçi isə yataq otağının temperaturunu 19 dərəcə olaraq təyin edir.
Marschalko bir blog yazısında demosunun necə işlədiyini ətraflı şəkildə izah edib. Görünən budur ki, Siri tərtibatçısı GPT-3 və HomeKit-i dəstəkləyən ağıllı ev cihazları arasında interfeys yaratmaq üçün Apple-ın “Qısayollar proqramından” istifadə edir. Bu çox maraqlı demo süni intellektlə inteqrasiya olunmuş səs köməkçilərinin nə edə biləcəyini göstərir. Bu arada, Marschalko qeyd edir ki, hər bir əmr GPT-3-ə göndərilən API sorğusu 0,014 dollara başa gəlir.
Xərcdən əlavə, videonun bəzi yerlərinin kəsildiyi də aydın məsələdir. Yəni səsli köməkçinin istifadəsində bəzi problemlərin olduğunu təxmin etmək çətin deyil və videoya yalnız seçilmiş hissələr əlavə edilib. Siri və digər oxşar köməkçilər zərərli kəlimələrdən istifadə etməyəcək şəkildə inkişaf etdirilib. Amma Marschalkonun hazırladığı kimi sistemlər təhlükəli və məxfi məlumatlar bildirməməklə bağlı təyinat almayıblar. Əslində GPT-3 də Siri kimi oxşar təhlükəsizlik tədbirlərinə malikdir, lakin bununla belə, yenə də bu tərz “sintezlənmiş” texnologiyalardan gələn gözlənilməz cavablarla qarşılaşa bilərik.
