Dünyanın ən populyar sosial media platformalarından biri olmağa davam edən instagram 2023-cü il üçün inkişafını davam etdirir. İstifadəçi təcrübəsini yaxşılaşdırmağa və təhlükəsizliyi artırmağa çalışan Meta, instagram platformasına yeniliklər gəldiyini açıqladı. Yeniliklərin bəziləri hər kəsə, bəziləri isə müəyyən edilmiş ölkələr üçün əlçatan ola bilər.
Səssiz rejim:
Meta altındakı ən əhəmiyyətli platforma olan instagram, ilk olaraq“səssiz rejim” xüsusiyyəti ilə ortaya çıxdı. “Səssiz rejim” xüsusiyyəti müəyyən müddət ərzində instagram tətbiqini tamamilə susdurmağa imkan verir. Bu telefonlarda “narahat etməyin” rejimini xatırladır. Məsələn, imtahanlar zamanı gənclərin diqqətinin yayınmaması üçün olduqca faydalı bir yenilik kimi görünür. Maraqlı məqam budur ki, səssiz rejimi aktivləşdirdiyimizdə bizə mesaj göndərən insanlar da bunu biləcək. Səssiz rejimdən çıxdığımız zaman səssiz rejimdə gələn bütün vacib bildirişləri toplu şəkildə təqdim ediləcək.
Reklamları və tövsiyə edilən paylaşımları daha yaxşı fərdiləşdirə biləcəyik:
Platformada görmək istəmədiyiniz məzmun üçün istifadə edə biləcəyiniz “Mənə maraqlı deyil” funksiyasını inkişaf etdirən İnstagram, artıq “Məni maraqlandırmır” düyməsi ilə eyni anda birdən çox məzmun seçməyə imkan verəcək. Bu xüsusiyyət də tövsiyə sistemini fərdiləşdirə bilməyimiz üçün olduqca faydalı olacaq.
Valideynlər üçün maraqlı funksiya:
Nəhayət, valideynlərin gənclərin tətbiqdən istifadəsi haqqında daha məlumatlı olmasını təmin etmək üçün İnstagram yeni funksiya təqdim edib. Artıq valideynlər övladları tərəfindən bloklanmış hesabları görə biləcəklər.
Bundan əvvəl şirkət əhəmiyyətli bir dəyişikliyi də elan etmişdi. instagram keçən həftə mobil tətbiqdə əsas ekrandan, xüsusilə də alt naviqasiya çubuğundan “mağaza” düyməsini siləcəklərini açıqlamışdı. “Fevral ayında Instagram naviqasiya infrastrukturunda yeniliklər” başlıqlı açıqlamada şirkət yeni dövr üçün bunları açıqladı:
“Fevral ayından başlayaraq, insanların dostları ilə əlaqə saxlamasını asanlaşdırmaq üçün platformanın naviqasiyasını dəyişdiririk. Tətbiqin altındakı naviqasiya panelinin ortasında məzmun yaratma / paylaşma qısayolu, sağda isə Reels olacaq. Bu dəyişikliyin bir hissəsi olaraq, “Mağaza” tabı bölmədən silinəcək.”
Əlbəttə ki, şirkət hələ ki, mağaza infrastrukturunu tamamilə ləğv etməyəcək. İstifadəçilər və ya şirkətlər hələ də instagram platformasındakı yeniliklər tam tətbiq olunana qədər mağazalarında satışa davam edə biləcəklər. Mağaza funksiyası isə ölkəmizdə aktual olmadığından bizim üçün o qədər də əhəmiyyətli olmayacaq.
