Elektromobillər ilə bağlı fikirlər müxtəlif və çeşidli olsa da hamının təsdiqləyəcəyi bir şey var ki, elektromobillərin servis xərcləri çox azdır. Daxili yanma mühərriki olmadığı üçün servisə gedərək yoxlatmalı olduğunuz elementlər minimal saydadır. Lakin elektromobillər hələ də ümumi baxımdan sadə nəqliyyat vasitələri olduğu üçün normal olaraq təkərlər ilə asfalta təmas edirlər. Araşdırmalar nəticəsində ortaya çıxıb ki, adi avtomobillər üçün illərdir təkmilləşdirilən təkərlər elektromobillərdə bəzi çatışmazlıqlarla qarşılaşırlar.
Bu vaxta qədər standart avtomobillər üçün hazırlanmış təkərlər elektromobillər ilə işləndikdə daha tez aşınırlar
Normal olaraq daxili yanma mühərrikli avtomobil üçün istehsal edilmiş təkərlər elektromobillər üçün də uyğundur və hal-hazırda istifadə edilir. Lakin avtomobillər mühəndislik əsəri olduğundan, işlədilən hər bir fərqli detal uzunmüddətli istifadədə fərqli nəticə verə bilir. Söhbət elektromobillər olduqda isə mövzu daha mürəkkəb bir hal alır.
Belə ki, elektromobillər ani ötürülən yüksək fırlanma anı, ağırlığın çox olması və digər səbəblərdən eyni sinifdəki sadə avtomobillərdən fərqlənirlər. Məsələn, Mercedes-Benz EQS 450 4Matic modelinin çəkisi 2539 kq olduğu halda, S 500 4Matic modeli 2091 kq çəkiyə malikdir. Hətta daha yaxın bir nümunə götürsək, Hyundai Kona modelinin elektrikli və daxili yanma mühərrikli variantı arasında 400 kq fərq var. Sərnişin və heç bir əlavə yük olmadıqda belə bu cür çəki fərqinin olması, elektromobil yüklü olduqda təkərlərə düşən yüklənməni daha da artırır. Bu, araşdırmalara görə ciddi şəkildə diqqətdən yayınan amildir.
Digər bir problem isə ani sürətlənə bilən elektromobillərin birdən-birə təkərləri normadan artıq yükləyə bilməsidir. Çəki onsuzda artıq olub, təkərlər də ani sürətlənmədə elektrik mühərriklərinin yüklənməsinə məruz qaldıqda normadan qat-qat tez aşınırlar. Təkərlərin yuvarlanma müqaviməti ilə bağlı da bəzi problemlər var. Normalda müqavimət əmsalının az olması üçün zavod tərəfindən elektromobillərin üzərində gələn təkərlər daha sərt təyin olunur. Lakin daha sonra satın alınan yeni təkərlər elektromobillər üçün xüsusi hazırlanmır deyə, daha yumuşaq olurlar. Nəticədə yuvarlanma əmsalı bəzi hallarda 40%-ə qədər artaraq, yürüyüş məsafəsini 20%-ə qədər azaldır.
Elektromobillər üçün yürüyüş məsafəsi çox qiymətli olduğundan itirilən məsafənin əhəmiyyəti inanılmaz dərəcədə böyükdür. Ən sona saxladığımız problem vacib bir şey olmasa da, səs izolyasiyası cəhətdən də elektromobillər üçün təkmilləşdirilən təkərlər biraz fərqli mühəndislik tələb edirlər. Elektromobillər çox səssiz işlədiyindən kabinə təkərlərin asfalt ilə sürtünmə səsi normadan daha artıq gələ bilir.
“Yaxşı bəs, nə edək?” deyə sual versəniz, əslində edəcək çox bir şey yoxdur. Araşdırmanı yayımlayan ArsTechnica resursunun verdiyi məlumata görə bazarda elektromobillərə uyğun təkər istehsal edən istehsalçı barmaqla sayacaq qədər azdır. Məhz elektromobillər üçün xüsusiləşdirilmiş təkərlər xüsusilə elektromobil istehsalçılarının özünə satılır. Bazara çıxarılan təkərlərin əksəriyyəti isə ümumi istifadə üçün nəzərdə tutulur. Ehtimallara görə yaxın illərdə təkər istehsalçıları requlyasiyalar ilə nizamlanmış elektromobil təkərlərini kütləvi şəkildə bazara çıxaracaqlar. Hankook Tire və Pirelli kimi şirkətlər bu barədə işlərə artıq çoxdan başlayıb.
