Ötən gün tanınmış insayder “Iceuniverse” tərəfindən Galaxy S23 seriyasının təqdimat tarixi sızdırılmışdı. Belə ki, insayder tərəfindən verilən məlumata görə Galaxy S23 seriyası 1 fevral tarixində baş tutacaq. Cənubi Koreya nəhəngi şirkətin 2023 Galaxy Unpacked tədbiri məhz 1 fevral tarixi üçün planlaşdırılır. Həmin tədbir çərçivəsində isə yeni flaqman modellər anons ediləcək. Digər bir tərəfdən isə 2 fərqli yenilik barədə “Galaxy club” Hollandiya resursu maraqlı bir məlumat yayıb. İddialara görə Samsung şirkəti Galaxy S22 FE modeli ilə birlikdə, Galaxy A74 modelindən də imtina etmiş ola bilər.
Galaxy A74 modeli ilə əlaqədar bu vaxta qədər heç bir inkişaf qeydə alınmayıb
Verilən məlumatda qeyd edilir ki, Samsung şirkətinin ilk 108MP kameralı orta seqment modeli olan Galaxy A73 çox az ölkədə satışa çıxarıldı. Galaxy A72 ilə müqayisədə satış və istehsal ədədləri də çox aşağı idi. Galaxy A74 isə, Galaxy A54, Galaxy A34 və Galaxy A24 modellərindən fərqli olaraq heç bir verilənlər bazasında yoxdur. Galaxy S23 seriyasının təqdimat tədbirinə 2 ay, yeni Galaxy A seriyasına isə sadəcə 3 ay qalıb. Bu vaxta qədər heç yerdə test edilməyən, əməliyyat sistemi hazırlanmayan və heç bir verilənlər bazasına daxil olmayan Galaxy A74 böyük bir ehtimalla ləğv edilib.
Galaxy A74 modelinin çıxarılmaması üçün məntiqli səbəblərdən biri də yeniliyin olmama ehtimalıdır. Galaxy A54 sahib olacağı yeni Exynos 1380 çipseti ilə performans cəhətdən Snapdragon 778G çipseti ilə oxşar olacaq. Nəticədə Galaxy A54 texniki cəhətdən Galaxy A73 modelinə yaxınlaşacaq. Galaxy A74 isə Snapdragon 778G ilə saxlanılsa Galaxy A73 modelindən heç cür fərqlənməyəcək. Çünki, şirkət kamera və ekran parametrləri cəhətdən bu seqmentdə əhəmiyyətli bir təkmilləşdirmə etmir. Beləliklə, Galaxy A74 modelinin təqdim edilməsi üçün ya nisbətən yüksək performanslı çipsetə, ya da tamamilə vacib bir səbəbə ehtiyac var.
Samsung holdinqi ötən həftə smartfon istehsalı ilə məşğul olan bölməsində ciddi kadr dəyişikliklərinə getmişdi. Ola bilsin yeni komanda Galaxy A və Galaxy S seriyasına bəzi yeniliklər gətirəcək. 2023-cü ildə Samsung smartfonlarında bəzi yaxşılaşdırmalarla qarşılaşa bilərik. Lakin hal-hazırda Galaxy A53 modeli ilə Galaxy S23 modeli arasında ciddi bir qiymət və performans fərqi olacağını nəzərə alsaq, vəziyyət həqiqətən acınacaqlı görünür.
