SpaceX şirkəti T-Mobile əməkdaşlığında smartfonlar üçün peyk ilə internet xidməti təklif etməyə planlaşdırır. Belə ki, SpaceX bu yaxınlarda ABŞ-nin Federal Rabitə Komissiyasına müraciət edərək ikinci nəsil Starlink peyklərini “birbaşa mobil” cihazlarla əlaqələndirmək üçün icazə istəyib. Yeni imkan Starlink-ə 3.0 Mbps və ya 7.2 Mbps pik yükləmə sürətində internet istifadəsi üçün sürət təmin edə bilər.
SpaceX indiyə qədər 3500 ilk nəsil Starlink peykini kosmosa yollayıb və 2024-cü ilə kimi 2000 ədəd təchizatlı Gen2 peykləri ilə “tam və davamlı” smartfon əhatə dairəsini istifadəyə verəcəyini bildirib. Digər bir tərəfdən Starlink peykləri 1 milyon istifadəçiyə çatmağı da bacarıb.
1 milyon aktiv abunəçiyə çatan Stralink, Twitter səhifəsindən verilən açıqlamada deyir:
“Starlink-in hazırda 1 milyondan çox aktiv abunəçisi var. Bu mərhələyə töhfə verən bütün Starlink müştərilərinə və komanda üzvlərinə təşəkkür edirik .”
Bu, marketinq baxımından müsbət bir inkişaf olsa da, mövcud istifadəçilər üçün o qədər də ürəkaçan xəbər deyil. Ookla-nın araşdırmasına görə, Starlink-in orta yükləmə sürəti 2021-ci ilin ikinci rübündən etibarən bütün ölkələrdə azalmağa başlayıb. Starlink istifadəçilərinin sayı artdıqca xidmətin performansı da aşağı düşüb. Bu yaxınlarda bir neçə peyk buraxıldıqdan sonra vəziyyətin yaxşılığa doğru dəyişəcəyi gözlənilir. Analitiklərin fikrincə, Starlink bu sürətlə davam edərsə təxminən 1,2 milyon abunəçisi ilə bazar lideri HughesNet-i geridə qoyacaq. Düşüncələrinizi rəylərdə qeyd edə bilərsiniz.
