Çinin texnologiya nəhəngi Huawei, bu gün yeni Huawei Watch Buds ağıllı saatını təqdim edib. Ötən günlərdə şirkətin yeni ağıllı saat modelinin görüntüləri sızdırılmışdı. Bu gün təqdim olunan ağıllı saatın ən maraqlı xüsusiyyəti isə naqilsiz qulaqlığa sahib olmasıdır. Belə ki, indiyə kimi bir çox şirkətlər naqilsiz qulaqlığa sahib ağıllı saat təqdim etsə də onların heç biri uğurlu alınmamışdı. Çinin texnologiya nəhənglərindən biri olan Huawei-nin təqdim etdiyi yeni ağıllı saat isə sınaqdan uğurla keçib.
Huawei Watch Buds ağıllı saatı hansı xüsusiyyətlərə sahibdir?
Naqilsiz qulaqlığa sahib ilk ağıllı saat modeli, Watch GT 3 ilə eyni dizayna malikdir. Sadəcə yeni ağıllı saatın qalınlığı biraz daha çoxdur. Bunun səbəbi isə daxilində yerləşən maqnitli qulaqlıqlardır. Qeyd edək ki, saatın ekran panelinin altında quraşdırılmış qulaqlıqlardan istifadə etmək üçün hər dəfə ekranı yuxarı qaldırmaq tələb olunur. Şirkət bildirib ki, ekran 100 min dəfədən çox açılıb-bağlanılaraq sınaqdan keçirilib.
Maraqlı xüsusiyyətlərdən biri odur ki, yeni ağıllı saatın daxilində quraşdırılan naqilsiz qulaqlıqlar cəmi 4 qram ağırlığındadır. Qeyd edək ki, qulaqlıqlar simmetrik olaraq səkkizbucaqlı silindr formasında dizayn edilib. Qulaqlıqların ağırlığının az olması istifadəçilərin saatdan daha rahat istifadə etməsinə imkan verir. Həmçinin güclü maqnit ilə təchiz olunan qulaqlıqlar çox yaxşı sinxronizasiya olunub. Qeyd edək ki, qulaqlıqlar həm də ANC və ya səs-küy azaltmaq funksiyasına sahibdir.
Huawei Watch Buds ağıllı saatının ekranına nəzər saldıqda bizi 1.43 düymlük AMOLED ekran paneli qarşılayır. Qeyd edək ki, ekran paneli 466×466 təsvir ölçüsünə və 326 PPI piksel sıxlığına malikdir. Bununla da biz saatın keyfiyyətli ekran panelinə sahib olduğunu rahatlıqla deyə bilərik.
Əlavə olaraq qeyd edək ki, çinli şirkətin yeni ağıllı saat modeli paslanmayan polad çərçivəyə sahibdir. Həmçinin istifadəçilər öz zövqlərinə uyğun olaraq istədikləri “Easyfit” kəmərdən istifadə edə bilərlər.
Naqilsiz qulaqlığa sahib yeni ağıllı saatın digər xüsusiyyətlərinə nəzər saldıqda isə bir çox sağlamlıq funksiyaları ilə də təchiz olunduğunu görə bilərik. Belə ki, ağıllı saatın 80-dan çox məşq rejimi, 200-dən çox sağlamlıq funksiyası mövcuddur. Bundan əlavə isə, istifadəçilər ağıllı saat ilə alış-veriş edə, bəzi ağıllı cihazları idarə edə bilərlər. NFC texnologiyası ilə təchiz edilmiş ağıllı saat HarmonyOS 3 əməliyyat sistemi ilə işləyir.
Batareya tərəfində isə Huawei Watch Buds modeli 410 mAs tutumlu batareya ilə təchiz olunub. Ağıllı saatın daxilində yerləşən qulaqlıqlar isə 30 mAs tutumlu batareyaya sahibdir. Şirkət iddia edir ki, ağıllı saatın tək şarjda ümumi istifadə müddəti 3 gündür. Qulaqlıqlara gəldikdə isə onların ANC aktiv olmadıqda 4 saat musiqi, 2.5 saat isə danışıq istifadə müddəti olduğu bildirilir. ANC aktiv olduqda bu göstəricilər müvafiq olaraq 3 saat və 2 saat olacaq.
Son olaraq qeyd edək ki, Huawei Watch Buds ağıllı saatının Çindəki başlanğıc qiyməti 429 dollardır. Yeni saatın digər ölkələrdə satışa çıxarılması isə öz təsdiqini tapmayıb.
