Çin smartfon istehsalçısı olan Huawei şirkətinin istifadəçilərin icazəsi olmadan smartfonların qalerayasında olan şəkil və videoları sildiyi iddia olunur. Belə ki, Twitter sosial platformasında brendə məxsus olan smartfondan istifadə edənlər, hökumət əleyhinə olan etiraz videolarının qalereyalarından avtomatik silindiyinin görüntüsünü paylaşıb. Qeyd edək ki, ötən həftə Çində karantin məhdudiyyətlərinə qarşı etirazlar başlayıb. Yerli xalqın qəzəbi isə əsasən hökumətin və hakim Kommunist Partiyasının siyasətinə yönəlib. Çinin nəhəng smartfon istehsalçısına məxsus smartfonlarda belə bir hadisənin yaşanması, smartfon istifadəçilərində etibarsızlıq hissi oyadıb. Hətta bir çox istifadəçi brendə Çin Kommunist Partiyasının nəzarət etdiyini də iddia edib.
Çindəki etiraz aksiyalarında hökumət və Kommunist partiyasının əleyhinə çıxış edənlərin smartfonlarının polis tərəfindən yoxlanıldığı iddia olunur. Hətta aksiya iştirakçıları bildirir ki, onlara aksiyada iştirak etməmələri barədə xəbərdarlıq zəngi də edilib. Görünən odur ki, hökumət aksiyalara aid görüntülərin ölkə xaricinə çıxması tərəfdarı deyil. Xatırladaq ki, 2019-cu ildə ilk dəfə Çində ortaya çıxan Koronavirus səbəbindən bütün dünya Çini günahlandırmışdı. İndi isə hökumət belə bir halın yaşanmaması üçün məlumatların ölkə xaricinə çıxarılmasının qarşısını almağa çalışır. Qəribə bir problem var ki, Huawei brendinə məxsus smartfonlarda olan etiraz görüntüləri də iddialara görə avtomatik olaraq silinir.
Huawei brendinin belə bir yola əl atması smartfon istifadəçilərində ciddi narahatlıq hissi oyadıb. Belə ki, onlar əlaqə məlumatlarınln, ünvanlarının və digər şəxsi görüntülərinin şirkət tərəfindən hökumətə verilib-verilməməsindən narahatdır. Hadisə ilə bağlı hələlik Çinin texnologiya nəhəngindən açıqlama verilməsə də, yaxın vaxtlarda bu barədə rəsmi açıqlama veriləcəyi gözlənilir.
