Süni intellekt müasir dövrümüzdə həyatımızın bir parçasına çevrilməyə davam edir. Belə ki, süni intellekt əsaslı robotlar artıq insanların əvəzinə kodlaşdırma edə, qrafik dizaynlar hazırlaya və digər bir çox fəaliyyəti yerinə yetirə bilir. Hələdə inkişaf etdirilməkdə olan süni intellekt texnologiyası gələcəkdə daha çox sahədə tətbiq oluna bilər. Ötən günlərdə Nvidia şirkəti süni intellekt əsasında yazılı mətnləri 3D modellərə çevirən Magic3D texnologiyasını təqdim edib. Qeyd edək ki, ötən aylarda Google şirkəti yazılı mətnləri 3D modellərə çevirən texnologiyası olan DreamFusion texnologiyasını hazırlamışdı. Nvdia şirkətinin iddiasına görə yeni texnologiya DreamFusion-dan 2 dəfə daha tez 3D obyekt yarada bilir.
Nvidia şirkətinin yeni Magic3D texnologiyası bizə nələr vədd edir?
Süni intellekt əsasında işləyən Magic3D texnologiyası yazılı mətndə olan məlumatları 3D model üzərində canlandırır. Nvidia şirkəti iddia edir ki, yeni texnologiyadan hər kəs rahatlıqla istifadə edə bilər. Yəni texnologiyadan istifadə etmək üçün heç bir xüsusi təlimə ehtiyac olmur. Qeyd edək ki, istifadəçilər 512 x 512 piksel ölçüsünə malik 3D modeli əldə etmək üçün sadəcə 40 dəqiqə gözləməlidir. Təbii ki, bu vaxt müddəti texnologiya inkişaf etdirildikcə azalacaq.
Qeyd edək ki, Nvidia şirkətinin yeni Magic3D texnologiyası, yazılı mətnləri 3D modelə çevirərkən 2 mərhələli sistemdən istifadə edir. İlk mərhələdə 3D model yaradılır, digər mərhələdə isə istifadəçinin qeyd etdiyi məlumatlar 3D model üzərində canlandırılır. Yeni yaranan texnologiya inkişaf etdirildikdən sonra video oyun sahəsinin inkişafını sürətləndirə bilər və bəlkə də film və televiziya sahəsində xüsusi effektlər üçün tətbiq oluna bilər.
