Bir şirkət hər şeyi mükəmməl edəcəm deyə fikirləşib necə “ağını” çıxara bilər? – Bəli, Vivo şirkəti X90 seriyasında bunu layiqincə etməyi bacarıb
Düşünə bilərsiniz ki, biz niyə məhz ilk cümləmizi şirkətin “ağını” çıxardığını bildirərək məqaləyə başlayırıq. Lakin birazdan smartfonların yaddaş variantları arasında belə modifikasiya fərqi olduğunu gördükdə böyük bir ehtimalla bizə qatılacaqsınız. İlk növbədə Vivo X90 seriyası münasibəti ilə brendi həqiqətən təbrik etmək lazımdır. “Extreme Imagination” imzalı bu cihazlar kamera parametrlərini sektorun ən yüksək səviyyəsinə çıxarmaqla qalmayıb, dizayn cəhətdən də olduqca mükəmməl iş ortaya qoyublar. Şəkillərdən də görəcəyiniz kimi, hər bir detalına qədər, hətta smartfonun qoburuna qədər hər detalda ümumi ahəng daşıyan elementləri işlədilib. Smartfonlar ortaq dizayna malik olduğundan cihazların arxasında “H” görünüşlü haşiyə yer alıb. Təqdimat zamanı Vivo X90, X90 Pro, X90 Pro+ olmaqal 3 cihaz nümayiş etdirilib. Hər 3 model də eyni gövdə üzərində hazırlanıb. Lakin Vivo X90 daha zəif kamera parametrlərinə sahib olduğu üçün kamera modulu daha kiçik alınıb.
Vivo X90 seriyası smartfonları bizə nə vəd edir?
Yeni Vivo X90 və Vivo X90 Pro modellərinin hər ikisinə 6.78 düymlük BOE istehsalı 120Hz tezlikli AMOLED ekran paneli quraşdırılıb. QHD+ təsvir ölçülü ekran paneli 1300 nit parlaqlığa sahibdir. Artıq Çinli brendlər AMOLED ekran panellərindən keyfiyyətə son dərəcə önəm verməyə başladığından, bu modeldə də 2160Hz tezlikli PWM texnologiyası mövcuddur. Yəni gözə zərərli titrəmələrin sayı minimuma endirilib və SGS yararlılıq sertifikatını əldə edib.
Seriyanın ən güclü nümayəndəsi olan Vivo X90 Pro+ modelində isə Samsung istehsalı dünyanın ilk 2K təsvir ölçülü E6 AMOLED paneli işlədilib. Maksimum 1800 nit parlaqlığa çıxan ekran paneli tam olaraq 517 ppi piksel sıxlığına malikdir. ZEISS texnologiyaları ilə də rəng optimizasiyaları edilmiş ekran paneli eyni zamanda 34% daha həssas işləyəcək şəkildə optimizasiya edilib. Ekranın PWM tezliyi isə 1440Hz təşkil edir. Təəssüf ki, 2160Hz ilə müqayisədə xeyli aşağıdır. Lakin yenə də rəqiblərlə müqayisədə yaxşı səviyyədədir. iPhone 14 Pro seriyasında bu dəyərin təqribən 240Hz olduğu bildirilir.
Performans cəhətdən baxdıqda isə Vivo X90 və Vivo X90 Pro modelləri öz gücünü Dimensity 9200 çipsetlərindən alır. Vivo X90 Pro+ modelinə Snapdragon 8 Gen 2 quraşdırılsa da şirkət bu çipsetin adını təqdimatda çəkmədi. Böyük bir ehtimalla Vivo şirkəti bu çipsetin sahib olduğu ilk cihaz kimi nümayiş haqqını ala bilməyib. Digər bir tərəfdən təqdimatın əsas tərəfdaşı MediaTek olduğundan təqdimat zamanı MediaTek Dimensity 9200 çipsetli ilk modellər sözü çox vurğulanıb. Avtomatik olaraq Snapdragon 8 Gen 2 daha güclü bir çipset kimi müzakirə edilməyib.
Təqdimat zamanı qarışıqlıq bununla bitməyib. Smartfonlar yaddaş və operativ yaddaş həcminə görə texniki cəhətdən fərqləniblər. Məsələn, Vivo X90 seriyası daxilində həm LPDDR5X, həm LPDDR5, həm UFS 4.0, həm UFS 3.1 çipləri ayrı-ayrılıqda mövcuddur. Tutalım X90 Pro modelinin 128GB variantını alsanız sizə UFS 3.1 yaddaş çipinə sahib cihaz təklif edilir. Əgər 256GB yaddaşa sahib variantını alsanız, yaddaş çipi UFS 4.0 olur. 512GB almaq istəsəniz bu dəfə də LPDDR5 yaddaş LPDDR5X ilə əvəzlənir.
Vivo X90 seriyası kamera cəhətdən hansı xüsusiyyətlərə malikdir?
Sadə Vivo X90 modeli 50MP Sony IMX866 sensorundan ibarət əsas kameraya sahibdir. Ultra-geniş bucaqlı kamerası 12MP Sony IMX663 olub, yerdə qalan üçüncü kamerası da yenə 12MP Sony IMX663 əsaslı 2 qat optik yaxınlaşdırma edə bilən telefoto kamerasıdır.
Lakin Vivo X90 Pro seriyası cihazları hesab edilən X90 Pro və X90 Pro+ modelləri 1 düymlük 50MP Sony IMX989 sensoruna malik əsas kameraya malikdir. Hər iki cihazda 50MP Sony IMX758 əsaslı 2 qat optik yaxınlaşdırma qabiliyyətli telefoto (portret) kamerası quraşdırılıb. Lakin Vivo X90 Pro+ modelində 64MP OV64B sensoruna əsaslanan 3.5 qat optik yaxınlaşdırma qabiliyyətli 90 mm periskopik telefoto kamerası mpvcuddur.
Ultra-geniş bucaqlı kameraları isə məhz Vivo X90 Pro+ modelində 48MP Sony IMX598 sensoruna əsaslanır. Vivo şirkəti ultra-geniş bucaqlı kameranı məhz bu modeldə “balıq gözü effekti” yaratmaması üçün xüsusi obyektivlə təchiz edib. Ümumilikdə Vivo X90 Pro+ modelinin bütün kameralarına OIS stabilizatoru quraşdırılıb. Lakin Vivo X90 və Vivo X90 Pro modellərinin yalnız əsas, o cümlədən telefoto kameralarında bu xüsusiyyət mövcuddur. Selfi kameraları isə ISOCELL S5KGD2 olub, 32MP təsvir ölçüsünə malikdir.
ZEISS şirkəti Sony ilə birlikdə işləyərək bu cihazın obyektivində rəngləri 15% daha dəqiq işləyən, rəng pozuntusunu 20% azaldan VCS spektrum texnologiyasını quraşdırıb. Smartfonun modulu üzərindəki şüşələr isə DSLR səviyyəli olub kölgələri və işıq sınmasını minimum endirir. Görüntü emalına isə birbaşa Vivo istehsal V2 ISP çipi cavabdehdir. 16TOPS emal gücünə sahib bu çip özlüyündə o qədər güclüdür ki, görüntülərin işlənməsində Vivo şirkəti Dimensity və ya Snapdragon çipsetlərinə “çox da etibar etmir”. Vivo X90 Pro+ modeli 14 bitlik RAW video görüntülər qeydə ala bilir. Dolby Vision və LOG formatlarını dəstəkləyir.
Smartfonların yerdə qalan xüsusiyyətlər nələrdir?
Vivo X90 seriyası daxilində sadə X90 modeli 120 Vatt sürətli naqilli şarj, X90 Pro modeli isə 120 Vatt sürətli naqilli şarjdan əlavə 50 Vatt naqilsiz şarj dəstəkləyir. Batareya həcmi isə 4810 mAs təşkil edir. Buna qarşılıq X90 Pro+ modelində 4710 mAs həcmli 80 Vatt naqilli və 50 vatt naqilsiz şarj dəstəkləyən batareya batareya quraşdırılıb. Vivo X90 Pro+ modeli sizə daha zəif gələ bilər. Lakin bu cihazda 2 hüceyrəli batareya quraşdırıldığ üçün 80 Vatt naqilli şarj iki ədəd 2350 mAs həcmli batareyaları 120 Vatt kimi sürətli doldura bilir.
Stereo səs ucaldanlara malik cihazlar kabelsiz bağlantı tərəfində Bluetooth 5.3, LDAC və aptXHD texnolgiyalarını dəstəkləyirlər. Nəticədə naqilsiz qulaqlıqlar ən yüksək keyfiyyətdə işləyir. Digər bir tərəfdən USB 3.2 Gen1 standartına da malikdirlər. Android 13 ilə qutudan çıxan cihazlar arasında Vivo X90 Pro+ modeli IP68 davamlılıq sertifikatı ilə gücləndirilib. Amma digər iki modeldə IP64 davamlılıq sertifikatı mövcuddur.
Smartfonların qiyməti
Düşünürük ki, Vivo X90 seriyası modellərin qiymətinə keçərək məqaləmizi sonlandıra bilərik. Seriya daxilində ən ucuz Vivo X90 modelidir ki, 518$ başlanğıc qiyməti ilə təklif edilir. Seriyanın ikinci yerdə olan Vivo X90 Pro modelinin başlanğıc qiyməti isə 700$ təşkil edir. Seriyanın ən üst nümayəndəsi olan Vivo X90 Pro+ isə 910$ qiymət etiketi ilə əlçatandır. Bütün bu qiymətlər Çin bazarı üçün keçərlidir. Smartfonların qlobal bazara nə vaxt gələcəyi naməlumdur.
