Honor brendi özünün olduqca sevilən brend seriyasını genişləndirməyə davam edir. Belə ki, Honor 70 seriyasının üzərindən təqribi 6 ay keçdikdən sonra Honor 80 seriyası rəsmi olaraq təqdim ediləcək. Əslinə qalsa Honor şirkətinin bu seriyası xeyli sevilən və diqqət çəkən xüsusiyyətləri özündə birləşdirsə də cihazların təqdimat aralığı çox yaxındır. Nəticə etibarilə ötən ilin iyun ayında təqdim edilən Honor 50 seriyasından bu yana şirkət artıq seriyanın dördüncü nəslini bazara çıxarır. Bu da markanın smartfonlarının ən azından mənəvi olaraq tez köhnəlməsinə səbəb olur. Proqram təminatı cəhətdən verilən dəstək tamamilə problemsiz olsa da alıcıların aldığı smartfonlar dəyərini təəssüf ki, çox tez itirə bilir.
Yeni Honor 80 seriyası özü ilə birlikdə nə gətirir?
Huawei törəməsi hesab edilən Honor brendi yeni “80”-ci seriyasında bəzi yenilikləri gətirməyi planlaşdırır. Onlardan ən diqqət çəkəni Honor 80 seriyası modellərində görəcəyimiz 160MP kamera və iPhone 14 seriyası bənzəri selfi kamerası quruluşu olacaq. Digər bir tərəfdən bu selfi kamerası quruluşunu Xiaomi Civi 2 modelindən də xatırlayırıq. Görüntülərdəki modelin tam olaraq Honor 80 modelinə aid olduğu düşünülür. Lakin ümumilikdə seriyanın dizayn xətti eyni olduğu üçün cihazların görünüşü ümumilikdə bu konsept üzərinə qurulacaq. Ən diqqət çəkən tərəfi isə kamera modulunda “8” rəqəminin dizayna işlənməsidir.
Qeyd edilənə görə Honor 80 SE modeli Dimensity 1080, Honor 80 modeli isə ehtimallara görə Snapdragon 782G çipsetindən güc alacaq. Snapdragon 782G çipseti, əslində bizə tanış deyil. Çox güman bu gündən etibarən başlayan Snapdragon Sammitində yeni nəsil Snapdragon 8 Gen 2 ilə birlikdə təqdim ediləcək. Adlandırma nəzərən Snapdragon 7 Gen 1 çipsetindən geridə olduğunu düşünsək, “Snapdragon 778G +++” deyə mövhumi olaraq düşünə bilərik. Honor 80 Pro modeli isə Snapdragon 8+ Gen 1 çipsetindən güc alacaq ki, performans cəhətdən flaqman səviyyəsində olacaq.
Kameralara gəldikdə isə Honor 80 seriyası ən güclü selfi kamerasına sahib cihazlara sahiblik etməlidir. İddialara görə normal smartfonların arxa kamera sensoru olan IMX766-nın yenilənmiş variantı IMX890 bu cihazlarda selfi kamerası ola bilər. Hansı ki, 1/1.56 düymlük 50MP kameradan söhbət gedir. Digər bir tərəfdən isə 160MP əsas kamera bu cihazlardan birinə quraşdırılacaq və 200MP kameralarla rəqabət edəcək naməlum bir sensor olacaq. Ola bilsin Sony şirkəti yüksək təsvir ölçülü 200MP kameralara rəqib olaraq 160MP kamerasını Honor 80 ilə sürpriz olaraq bazara çıxara bilər.
Hələ ki, smartfonlar barədə qeyd edəcəyimiz detallar bunlardır. Təqdimat tarixi 23 noyabrda baş tutacaq və cihazların mövcudluğu, eyni zamanda qiymət barədə məlumatlar təqdimatdan sonra məlum olacaq.
