Avtomobil nəhənglərindən olan Volvo yeni EX90 elektromobilini təqdim edib. Volvo şirkəti 2010-cu ildə Çinin avtomobil şirkəti olan Geely şirkətinə satılmışdı. Belə ki, brendin yeni modeli olan EX90, Volvo XC90 modelinin davamçısı hesab olunacaq. Yeni elektromobilin ən cəlbedici xüsusiyyətləri isə 600 km yürüyüş məsafəsinə sahib olması və güclü elektrik mühərrikin 910 nm fırlanma anı hasil etməsidir.
Volvo EX90 elektromobilinin xüsusiyyətləri
Volvo brendinin yeni elektromobilinin eksteriyerinə nəzər saldıqda elektromobillərdə hər zaman gördüyümüz saxta radiator barmaqlığının bu elektromobildə qruaşdırılmadığını görürük. Şirkət bu modeldə ənənəvi Volvo dizaynının cizgilərinə sadiq qalıb. Həmçinin Volvo EX90 elektromobili Polestar 3 modeli ilə də bənzərlik təşkil edir.
Qeyd etməliyik ki, yeni elektromobilin eksteryer dizaynı bu elektromobil üçün olduqca futuristik alınıb. Elektromobil dünyasında ötən axşam bu elektromobil çox maraqla qarşılanıb. Volvo bu elektromobildə də təhlükəsizliyi ən ön plana çıxarıb. Yeni EX90 müasir LIDAR texnologiyası ilə təchiz olunub. Bu texnologiya vasitəsi ilə elektromobil 250 metr məsafəyədək piyadaları müəyyən edə bilir. Lidar texnologiyasını elektromobilin ön şüşəsinin üzərində görmək mümkündür. Bundan əlavə olaraq isə elektromobilin hər tərəfi kamera və radarlar ilə təchiz olunub. Elektromobilin ən önəmli xüsusiyyətlərindən biri isə salonda olan hərkəsi izləməsidir. Belə ki, əgər uşaq və ya ev heyvanı elektromobildə qalarsa elektromobil bunu bildirir.
Elektromobilin interyerinə nəzər saldıqda isə əsasən Tesla modellərində gördüyümüz sadə salon və böyük ekran paneli bizi qarşılayıb. Elektromobilin salonunda 2 ekran paneli yerləşir. Bunlardan biri kiçik rəqəmsal panel, digəri isə 14.5 düymlük böyük ekran panelidir. Sürücü elektromobilin bütün funksiyalarından bu ekran paneli vasitəsi ilə istifadə edə bilər. Belə ki, elektromobil ən son texnologiyalar ilə də təchiz olunub. Bunlara Apple Car Play, 5G Wifi bağlantısı, Dolby Atmos dəstəyi, Google xidmətləri aiddir. Həmçinin şirkət elektromobili istehsal edərkən təkrar emal olunmuş materiallardan da istifadə edib.
Yeni Volvo EX90 elektromobili 2 versiyada təklif olunur. Bunlara Sadə və Performans versiyaları aiddir. Sadə versiyada elektromobil tam ötürüclü 2 elektrik mühərriki ilə təklif edilir. Bu mühərrik 408 at gücü və 770 nm fırlanma anı hasil edir. Performans versiyasında isə elektromobil 517 at gücü və 910 nm fırlanma anı hasil edir və 100 km/saat sürətinə 4.9 saniyəyə sürətlənə bilir. Batareya tərəfinə nəzər saldıqda isə hər ikisinin 111 kVts batareya ilə təchiz olunduğunu görürük. Şirkətin iddiasına görə elektromobil 10 faizdən 80 faizə sadəcə 30 dəqiqəyə şarj ola bilir. Həmçinin tək şarj ilə 600 km məsafə vədd edir.
