Telegram şirkətinin CEO-su Paver Durov öz telegram kanalında istifadəçi adlarını satan ticarət platforması Fragment-in istifadəyə verildiyini elan edib. Belə ki, pul müqabilində alınmış istifadəçi adlarını şəxsi hesab və ya kanal ünvanı kimi istifadə etmək mümkündür. Ötən yayın sonunda şirkət il ərzində aktiv olmayan istifadəçi adlarını və kanal ünvanlarını silmişdi. Məsələn, bunlara @dior, @auto və @fifa adları daxildir. Bu addım həm proqramda aktiv olmayan istifadəçi adlarını təmizləmək, həm də bu cür ünvanları maraqlı tərəflərə sataraq pul qazanmaq məqsədi daşıyacaq.
Telegram, maraqlı və populyar istifadəçi adlarını artıq satışa çıxarıb. Belə ki, istifadəçi adları auksion prinsipinə uyğun olaraq satılır. Yəni, istifadəçilər təklif verir və 7 günlük hərracın sonunda ən yüksək təklifi verən qazanır. Başlanğıc qiyməti isə istifadəçi adının uzunluğundan asılıdır. İstifadəçi adı nə qədər qısa olarsa, qiymət də bir o qədər yüksək olacaqdır. Məsələn, dörd hərfli ünvan üçün minimum məbləğ 10 min Toncoin-dir bu isə təxminən 19 min dollara bərabərdir. Hal-hazırda Fraqment platforması tərəfindən qəbul edilən yeganə valyuta Toncoin-dir.
Fraqment platforması TON blokçeyni üzərindəqurulub. Bütün istifadəçi adları TON blokçeynində NFT kimi təqdim olunacaq. Yəni, onların mülkiyyətinə heç vaxt etiraz edilə bilməz və əməliyyatlar geri qaytarıla bilməz. Bütün istifadəçi adları TON token standartlarına cavab verir, buna görə də onlar TON kriptovalyuta hesabında saxlanıla bilər.
Durov bildirib ki, yaxın günlərdə Fragment istənilən istifadəçiyə öz istifadəçi adını satışa çıxarmağa imkan verəcək. Telegram-ın yaradıcısı onu da qeyd edib ki, sosial şəbəkə tarixində ilk dəfə olaraq istifadəçi adları üçün dürüst və şəffaf bazar yaradılıb.
