Microsoft, ilk dəfə 1983-cü ildə təqdim etdiyi NotePad tətbiqinə süni intellekt dəstəyi gətirəcəyini elan edib. Beləliklə, 39 yaşlı tətbiq süni intellekt sayəsində yenilənir. Tətbiq indi bir çox insan üçün əvəzolunmaz hesab olunur.
Microsoft-un açıqlamasına görə, NotePad tətbiqi əldə edəcəyi süni intellekt dəstəyi sayəsində yazılı mətnin başdan sona nəzərdən keçirilməsinə və hətta dəyişiklik edilməsinə imkan verəcək. “Yenidən yazmaq” adlanacaq xüsusiyyət, Notepad-i bir çox insan üçün yenidən əhəmiyyətli edəcək. Notepad-in Yenidən Yazma xüsusiyyəti çox əhatəli bir quruluşa sahib olacaq. İstifadəçilər bu funksiyadan istifadə edərək mətni əvvəldən axıra kimi dəyişə biləcəklər. Belə ki, burada mətnin uzunluğu və cümlələrin ifadəsi də düzəldilə bilər.
Qeyd edək ki, yenidən yazma adlanan bu süni intellekt funksiyası hazırda Windows 11 sistemində sınaqdan keçirilir. Əgər uğurlu olarsa, süni intellekt dəstəkli NotePad çox yaxında ABŞ, Fransa, İngiltərə, Kanada, İtaliya və Almaniyadakı istifadəçilər üçün əlçatan olacaq. Bununla belə, Microsoft hələ də dəqiq tarix açıqlamaq niyyətində deyil. Ümumiyyətlə, Microsoft son dövrlərdə bir çox tətbiq və brauzerinə süni intellekt əlavə etməklə bir növ rəqiblərini qabaqlamaq niyyətindədir. Hətta, CoPilot ilə Microsoft istədiyinə nail olub deyə bilərik. Habelə, texnologiya nəhəngi oxşar dəstəyi daha əvvəl Paint tətbiqinə də əlavə edərək istifadəçilərini sevindirmişdi.
