Xatırlayırsınızsa ötən ilin iyul ayında pegasus gündəmi zəbt etmişdi. Pegasus proqramı nədir desəniz, İsrailli NSO Group adlı “kiber-silah” istehsalçısı tərəfindən hazırlanmış ictimaiyyətə məlum olanlar arasında dünyanın ən güclü cəsus proqramlarından biridir. Hansı ki, pegasus hədəf aldığı insanın xüsusilə smartfonuna marka və əməliyyat sistemi fərqi olmadan daxil olmağı bacarır. Üstəlik pegasus cəsus tətbiqinin smartfona daxil olması üçün istifadəçinin bir şey etməsinə, nəyəsə toxunub daxil olmasında ehtiyac yoxdur. Pegasus o qədər mükəmməl hazırlanmışdır ki, hücum edilən tərəf smartfonuna hansısa bir müdaxilə olduğu barədə qətiyyən xəbərdar ola bilməz.
Məsələn, smartfondakı kameralar tətbiqində təhlükəsizlik boşluğu var. Cəsus proqramının tərtibatçıları hədəf şəxsə mesaj, zəng və ya hanısa bir metodla ismarıc göndərərək birbaşa həmin təhlükəsizlik boşluğuna uzanıb smartfonu tamamilə ələ keçirə bilirlər. Daha sonra sistem həmin mesajı və ya daxil olarkən yaranan hansısa bildiriş izini öz-özünə dərhal silir. Siz nə həmin mesaj barədə, nə də smartfonunuza daxil olan cəsus proqramı barədə xəbərdar olmursunuz. Pegasus cəsus tətbiqinin izi isə, yalnız xüsusi metodlarla sistem fayllarının çıxarılaraq kompüterlərlə analizi zamanı aşkar oluna bilər. Bir müddət əvvəl bəhs etdiyimiz kompüter virusu kimi, pegasus cəsus proqramı da cihazdan heç bir üsulla silinə bilməz.
Pegasus ilə sizi izləyən şəxs və ya şəxslər, smartfonun bütün texniki imkanlarını ələ keçirmiş hesab edilirlər. Yəni smartfonda etdiyiniz bütün hərəkətlərin qarşı tərəfə ötürülməsi və smartfonun bütün xüsusiyyətlərinə görünməyən kənar müdaxilələr Pegasus ilə mümkündür.
Şirkətə milyonlarla dollar qazandıran Pegasus cəsus proqramı nəyə bənzəyir?
Yayımlanmış görüntülər Pegasus cəsus proqramının interfeysini ilk dəfə ortaya çıxarıb. Haaretz tərəfindən paylaşılan şəkillərdə tətbiqin olduqca köhnə versiyası olduğu deyilən variantından görüntülər bölüşülüb.
NSO Group şirkətinin 2010-cu ildən fəaliyyətdə olduğunu nəzərə alsaq, başladıqlarından sadəcə 4-5 il sonraya aid olan Pegasus prototip variantının görüntülərini hal-hazırda görürsünüz. Deyilənə görə tətbiq bu halı ilə həmin vaxtlar yüksək səviyyəli polis sistemlərində istifadəyə verilib.
Lakin 7-8 il bundan əvvəlki versiyası belə çox ciddi xüsusiyyətləri özündə birləşdirib. İnterfeysi olduqca sadə hazırlanan Pegasus cəsus proqramı izlənilən insanın cihazındakı bütün xüsusiyyətləri əlçatan edib.
Üstdəki siyahıda yeri göstərən GPS düyməsindən tutmuş, sistem komandaları daxil etmək, mikrofon və kameraya müdaxilə etmək, ayrı-ayrılıqda bütün platformalardakı mesajları oxumaq və.s kimi xüsusiyyətlər diqqət çəkir. Tətbiq nəinki mikrofonu istənilən zaman açmaq, bütün danışıqları daim qeydə almağa qədər cəsus tətbiqi üçün bütün “zəngin” xüsusiyyətləri özündə birləşdirib. İndi siz təsəvvür edin ki, 2014-ci ildən daim inkişaf etdirilən pegasus cəsus tətbiqi ötən vaxt ərzində nə qədər təkmilləşdirilə bilər.
Bu mövzu barədə siz nə fikirləşirsiniz? Fikirlərinizi rəylərdə qeyd edərək bizimlə bölüşməyi unutmayın.
