Süni intellekt və robototexnika sahəsində sürətli inkişaf bir vaxtlar elmi-fantastik əsərlərdə gördüyümüz humanoid robotları real işçi qüvvəsinə çevirməyə başlayıb. Bu robotlar artıq yalnız sərgilərdə nümayiş etdirilmir, insanlarla birlikdə işləmək üçün istehsal müəssisələrinə və xidmət sahələrinə yerləşdirilir.
Counterpoint Research şirkətinin hesabatına görə, 2026-cı ilin ilk yarısında qlobal humanoid robot tədarükləri illik müqayisədə təxminən 300 faiz artaraq 22 min ədədi keçib. Bu göstərici sektorun prototip mərhələsindən tədricən genişmiqyaslı kommersiya istifadəsinə keçdiyini göstərir.
Bazarda əsas üstünlük Çin şirkətlərinə məxsusdur. Tesla və Figure AI kimi Qərb şirkətləri humanoid robotları ilə diqqət çəksə də, kütləvi istehsal və tədarük göstəricilərində Çin istehsalçıları öndədir. Qlobal miqyasda ən çox robot tədarük edən ilk beş şirkətin hamısı Çin şirkətləridir və onların ümumi bazar payı 86 faizə çatır.
Bazarın lideri AGIBOT 2026-cı ilin ilk yarısında təxminən 9700 humanoid robot tədarük edərək 43 faizdən çox bazar payına sahib olub. İkinci yerdə 7000-dən çox robotla Unitree qərarlaşıb. İlk beşliyi isə Galbot, UBTECH və Leju Robotics tamamlayır.
Bazarda artımın əsas səbəblərindən biri humanoid robotların real sənaye proseslərində istifadə edilməyə başlanmasıdır. Tədarüklərin getdikcə daha böyük hissəsi istehsal və xidmət sektoruna yönəlir.
Məsələn, AGIBOT G2 robotlarını Longcheer Technology və Joyson Electronics ilə əməkdaşlıq çərçivəsində birbaşa istehsal xətlərində yerləşdirməyə başlayıb. Galbot isə mart ayında batareya nəhəngi CATL-nin istehsal xətlərində robotlarının sınaqlarını uğurla həyata keçirdiyini açıqlayıb.
Tələbatın artması istehsalçıların planlarını da dəyişir. UBTECH Walker S seriyalı humanoid robotlar üçün 2026-cı il üzrə əvvəlcə 2000-3000 ədəd nəzərdə tutduğu tədarük proqnozunu 5000 ədədə yüksəldib.
Counterpoint Research bazardakı sürətli artımın ilin ikinci yarısında da davam edəcəyini proqnozlaşdırır. 2026-cı ilin sonunda qlobal humanoid robot tədarüklərinin 50 min ədədi keçəcəyi və illik artımın təxminən 210 faiz təşkil edəcəyi gözlənilir. Hazırda sınaq mərhələsində olan bir sıra layihələrin ilin ikinci yarısında kütləvi tətbiq mərhələsinə keçməsi də gözlənilir.
Növbəti beş il ərzində isə humanoid robotlara tələbatın əsas mənbəyinin sənaye və xidmət sektoru olacağı proqnozlaşdırılır. Araşdırma və əyləncə məqsədli tətbiqlərin bazardakı payının nisbətən azalacağı gözlənilir.
Eyni zamanda istehsalçılar arasındakı rəqabət yalnız hansı robotun daha sürətli və ya daha bacarıqlı olması ilə müəyyənləşməyəcək. Robotları konkret iş proseslərinə inteqrasiya edə bilən, güclü süni intellekt modellərini real istehsal mühitinə uyğunlaşdıran və bütün sistemi vahid məlumat infrastrukturu ilə idarə edə bilən şirkətlərin üstünlük qazanacağı gözlənilir.
