Cənubi Koreya mərkəzli texnologiya nəhəngi olan LG şirkəti dünyada keyfiyyətli LCD, OLED ekran panelləri ilə tanınır. Qeyd edək ki, şirkət 1999-cı ildə məşhur Philips şirkəti tərəfindən ekran panelləri istehsalı üçün yaradılmışdı. 2008-ci ildə Philips ilə yollarını ayıran şirkət adını LG Display olaraq dəyişmişdi. Ötən gün şirkət avtomobillər üçün hazırladığı yeni görünməz dinamik məhsulunu təqdim edib. Qeyd edək ki, yeni dinamiklər avtomobillər üçün ideal olacaq nazik quruluşa malikdir.
Yeni “görünməz” dinamik hansı xüsusiyyətələrə malikdir?
Şirkətin hazırladığı yeni görünməz dinamik texnologiyası həmçinin Thin Actuator Sound Solution adlanır. Qeyd etdiyimiz kimi, brendin yeni dinamiki avtomobillərdə istifadə olunan səs bobinləri, konus və maqnit quruluşlu dinamiklərdən fərqli olaraq çox nazik quruluşa malikdir. Belə ki, şirkət yeni texnologiyası ilə avtomobillərdəki müxtəlif panelləri vibrasiya edərək 3D və immersiv səs təcrübəsini təmin etməyi hədəfləyir. LG şirkətinin yeni dinamiki 2,5 mm qalınlığında və 150 mm x 90 mm ölçüsündədir. Müqayisə üçün deyə bilərik ki, 2 ədəd qəpik üst-üstə qoyularsa 2,5 mm qalınlığında olur. Həmçinin çəkisi 40 qram olan dinamik çox kiçik olduğu üçün onu avtomobilin hər yerinə quraşdırmaq mümkündür. Şirkət bildirib ki, yeni dinamik adi avtomobil dinamiklərinin çəkisinin sadəcə 30 faizini, qalınlığının isə 10 faizini təşkil edir.
Əlavə olaraq qeyd edək ki, LG Display və Sony artıq OLED televizorlarında oxşar vibrasiya panellərindən istifadə edirlər. Texnologiya tamamilə yeni və innovativ olmasa da, ənənəvi dinamikləri əvəz edəcək qədər geniş yayılmayıb. Güman olunur ki, gələcəkdə avtomobillərdə və digər nəqliyyat vasitələrində bu texnologiyadan geniş istifadə olunacaq. Xüsusilə də oturacaq başlıqlarına quraşdırılacaq bu dinamiklər sərnişinlərin işini asanlaşdırmalıdır. Həmçinin şirkətin gələn ilin yanvarında Las-Veqasda keçiriləcək CES 2023 sərgisində texnologiya haqqında daha çox məlumat verəcəyi gözlənilir.
