Redmi, iyulun 14-də Çində təqdim ediləcək Redmi Note 17 Pro modeli ilə bağlı yeni məlumatlar paylaşıb. Şirkət smartfonun böyük batareyaya, möhkəm korpusa və diqqətçəkən ekran xüsusiyyətlərinə sahib olacağını təsdiqləyib.
9000 mAh batareya və 67 Vt sürətli enerji doldurma
Redmi Note 17 Pro 9000 mAh tutumlu batareya ilə təchiz ediləcək. Smartfon 67 Vt gücündə sürətli enerji doldurmanı, həmçinin 22,5 Vt gücündə simli əks enerji doldurma funksiyasını dəstəkləyəcək. Bu xüsusiyyət sayəsində cihazdan digər elektron qurğuları enerji ilə təmin etmək də mümkün olacaq.
Batareya üçün 4 illik xüsusi zəmanət
Şirkət yeni model üçün qeyri-adi satış sonrası xidmət də təqdim edəcəyini açıqlayıb.
Satışın ilk günlərində smartfonu alan istifadəçilər üçün belə bir proqram nəzərdə tutulub: əgər batareyanın tutumu ilk 4 il ərzində 80%-dən aşağı düşərsə, Redmi onu ödənişsiz dəyişəcək.
Bundan da maraqlısı odur ki, batareyanın dəyişdirilməsinə ehtiyac 5-ci ildə yaranarsa, istifadəçilərə standart 9000 mAh batareya əvəzinə 10 000 mAh tutumlu yeni batareya quraşdırılacaq.
3500 nit parlaqlığa malik ekran
Redmi Note 17 Pro 1.5K təsvir ölçülü düz OLED ekranla təchiz olunacaq. Ekranın maksimal parlaqlığı 3500 nit təşkil edir.
Smartfonun ekranı Corning Gorilla Glass Victus 2 qoruyucu şüşəsi ilə mühafizə olunacaq.
3 metrdən düşməyə davamlıdır
Şirkətin açıqladığı məlumata görə, Redmi Note 17 Pro müxtəlif davamlılıq sınaqlarından uğurla keçib. Smartfon hətta 3 metr hündürlükdən mərmər döşəməyə düşmə testindən də zədələnmədən çıxmağı bacarıb.
Bundan əlavə, cihaz IP69K sertifikatına malik olacaq. Bu isə smartfonun toza qarşı tam qorunduğunu və yüksək təzyiqli su axınına qarşı da davamlı olduğunu göstərir.
Redmi daha əvvəl cihazın stereo dinamiklərlə və Snapdragon 6 seriyasına aid prosessorla təchiz ediləcəyini də təsdiqləyib. Smartfonun bütün texniki xüsusiyyətləri və qiyməti iyulun 14-də keçiriləcək təqdimatda açıqlanacaq.
