Yaponiya texnologiya sahəsində liderliyini bir daha nümayiş etdirib. Belə ki, Karaoke barlarından kvadrat qarpızlara, yüksək texnologiyalı tualetlərdən saatda 360 km-ə çatan Şinkansen sürət qatarlarına qədər bir çox yeniliyin vətəni olan ölkə indi dünyanın ilk 3D printer ilə tikilmiş qatar stansiyasını təqdim edib. Beləliklə, Yaponiyada dünyanın ilk 3D printer ilə tikilən qatar stansiyası təqdim olunub.
Dəmiryolu şirkəti JR West Vakayama prefekturasında 3D çap texnologiyasından istifadə edərək illər ərzində istifadəsiz qalan taxta vağzal binasını tamamilə təmir edib. Şirkət bu layihədə 3D çap edilmiş evlər üzrə ixtisaslaşmış Serendix şirkəti ilə əməkdaşlıq edib. Mart ayında elan edilən layihə cəmi üç saat ərzində tamamlandı. Tikinti prosesi qatar xidmətləri arasında aparılıb və stansiya binası dörd ayrı hissədə relslər üzərində daşınaraq yerində yığılıb.
Cəmi 10 kvadratmetr sahəsi olan kənd stansiyası əvvəlcə planlaşdırılan altı saatlıq vaxtın yarısında tamamlanıb. Bundan əlavə, ənənəvi dəmir-beton konstruksiyalarla müqayisədə xərclər iki dəfə azalıb. Yaponiyanın tez-tez yaşadığı zəlzələlərə nəzər salınaraq inkişaf etdirilən quruluş davamlılığı ilə də diqqət çəkir. Qeyd edək ki, yeni bina bir neçə əvvəlcədən hazırlanmış komponentlərdən, o cümlədən bazası və divarları olan 5,5 tonluq konstruksiya, naringi motivli 2,5 tonluq dekorativ divar və 6 tonluq əyri damdan yaradılmışdır. Binanın montajında kran maşinisti də daxil olmaqla 6 işçi çalışıb.
