Çinin məşhur avtomobil istehsalçısı və dünyada ən çox elektromobil satışı həyata keçirən BYD Özbəkistanda avtomobil istehsalına başlayıb. Özbəkistan Prezidenti Şavkat Mirziyoyev və BYD sədri Wang Chuanfu istehsal olunan ilk modelin konveyerdən çıxmasının şahidi olublar. Qeyd edək ki, çinli avtomobil nəhəngi ilk olaraq Özbəkistanda hibrid avtomobillərin istehsal edilməsinə başlayıb.
Özbəkistanın Cizzak bölgəsində BYD və UzAuto-nun birgə müəssisəsi olaraq qurulan fabrik ildə 50 min avtomobil istehsal etmək gücünə malikdir. Həmçinin BYD Özbəkistanda ilk olaraq Song Plus və Chazor hibrid modellərini istehsal edib. İstehsalın başlanması münasibətilə Özbəkistan Prezidenti Şavkat Mirziyoyev BYD-nin Çindəki baş ofisində olub və şirkətin yüksək səviyyəli menecerləri ilə görüş keçirib. Görüş zamanı Mirziyoyev bəyan edib ki, gələcəkdə istehsalın həcmi ildə 300 min ədədə çatdırılmalıdır.
Özbəkistandakı yeni fabrik elə BYD Özbəkistan Fabriki olaraq adlandırılıb. Fabrikdə Song Plus krossoverinin və Chazor sedanının istehsalına başlanılıb. Qeyd edək ki, fabrikin ilk istehsal etdiyi avtomobilin istehsal prosesini uzaqdan izləyən Wang, Özbəkistan prezidentinə Özbəkistan bazarında satışa çıxarılan 10 000-ci elektromobil olan 1200 at güclü Yangwang U8-i hədiyyə edib. Ümumiyyətlə BYD brendi bu il ərzində fabriklərini müxtəlif bölgələrdə açmağı düşünür. Bununla da, avtomobil nəhəngi müxtəlif regionlarda elektromobil satışı üzrə liderliyi ələ ala bilər.
