“Technest” Təqaüd Proqramı 2021-ci ildən etibarən İnnovasiya və Rəqəmsal İnkişaf Agentliyi tərəfindən həyata keçirilir. “Technest” Təqaüd proqramının məqsədi informasiya texnologiyaları üzrə milli kadrların yetişdirilməsini sürətləndirmək, bu sahədə mövcud çatışmazlıqları aradan qaldırmaq və ölkədə rəqəmsal inkişafa töhfə verməkdir. “Technest” – məktəblilər, tələbə və məzunlar üçün İKT sahəsində peşəkar və ödənişsiz təlimləri təmin edən təqaüd proqramıdır. Eyni zamanda sahibkarlıq təfəkkürü ilə çıxış edən və innovativ həllər təklif edən gənclərin gələcəkdə startaplar qurmasında önəmli rol oynayan əməkdaşlıq müstəvisidir. Yəni “Technest” Azərbaycan gəncliyi üçün açılmış yeni fürsətlər pəncərəsidir. “Technest” təqaüdçülərinin qabaqcıl mütəxəssislər kimi yetişdirilməsi və işlə təmin olunması əsas vəzifələrdən biridir.
2022-ci ilin sonuna kimi “Technest” çərçivəsində 800-ə yaxın məzunun bulud həlləri, bulud inzibatçılığı, böyük məlumatlar bazası, kibertəhlükəsizlik, avtomatika, elektronika, müxtəlif proqramlaşdırma dilləri, “UX/Uİ” və 3D dizayn kimi müxtəlif istiqamətlər üzrə təhsil alması mümkün olub. 2022-2023-cü tədris ilində isə məzunlarımızın sayını 2000-ə çatdırılması hədəflənib.
İnnovasiya və Rəqəmsal İnkişaf Agentliyi “Technest” təqaüdçülərinin qabaqcıl mütəxəssislər kimi yetişdirilməsi istiqamətində dövlət-özəl sektor tərəfdaşlığı əsasında “Code Academy”, İsrail – Azərbaycan Təlim Mərkəzi, “Tech Academy”, “IKT Lab”, “ABB Tech” Akademiyası və İnnovasiyalar Mərkəzi və Bakı Dizayn Akademiyası və.s ilə yaxından əməkdaşlıq edir.
Məlumat üçün bildiririk ki, İnnovasiya və Rəqəmsal İnkişaf Agentliyinin həyata keçirdiyi “Technest” Təqaüd Proqramı çərçivəsində qəbula başladığını elan edir. İlk növbədə Bakı üzrə başlayan qeydiyyat dalğası 10 fevral tarixinə kimi davam edəcək. Müvafiq elektron keçidə daxil olmaqla qeydiyyat haqqında ətraflı məlumat əldə etmək olar.
Startap ekosistemi xəbərlərini "İnformasiya və Rəqəmsal İnkişaf Agentliyi" ilə tərəfdaşlığımız çərçivəsində oxuyursunuz.
