Çin texnologiya nəhəngi Xiaomi, flaqman smartfon seriyasının adlandırılmasında ənənəvi ardıcıllığı pozmağa hazırlaşır. Sənaye daxilindən gələn güclü sızdırmalara görə, şirkət gözlənilən “Xiaomi 18” modelini təqdim etməkdən keçərək, bazara birbaşa Xiaomi 26 adı ilə çıxış edə bilər. 2026-cı ilin payız aylarında təqdim edilməsi gözlənilən bu yeni seriya, brendin adlandırma siyasətindəki ən böyük sıçrayışlardan biri kimi qiymətləndirilir.
Əslində, Xiaomi üçün model nömrələrini atlamaq yad bir strategiya deyil. Şirkət rəqabətədavamlılığını qorumaq məqsədilə yaxın keçmişdə də bənzər bir addım atmış “Xiaomi 16” modeli ləğv edilərək birbaşa “Xiaomi 17” seriyası təqdim olunmuşdu. Mütəxəssislər o vaxt bu həmlənin Apple-ın “iPhone 17” seriyası ilə psixoloji rəqabət aparmaq üçün edildiyini bildirmişdilər. İndi isə 18 əvəzinə birbaşa Xiaomi 26-ya keçid qərarının arxasında həm məhsul xəttini sadələşdirmək, həm də buraxılış ilini əks etdirən rəqəmlərdən istifadə etmək hədəfi dayanır.
Bu radikal qərarın ən böyük ilham mənbəyi yenə də Apple olaraq göstərilir. Texnologiya kulislərində gəzən şayiələrə görə, Apple nömrələmə sistemində köklü dəyişiklik edərək iOS, macOS və digər əməliyyat sistemlərində ənənəvi ardıcıllığı pozub 26 kimi rəqəmdən istifadə etməyi planlaşdırır. Məqsəd, proqram təminatı versiyasını birbaşa 2026-cı illə eyniləşdirməkdir. Görünən odur ki, Xiaomi rəqibinin bu yeni “ilə əsaslanan adlandırma” trendindən geri qalmaq istəmir.
Dəyişiklik təkcə smartfonlarla məhdudlaşmayacaq. Hesabatlar təsdiqləyir ki, Xiaomi özünün fərdi istifadəçi interfeysi olan HyperOS-da da analoji addımı atacaq. Belə ki, şirkətin HyperOS 4 əvəzinə birbaşa HyperOS 26 versiyasını istifadəyə verəcəyi gözlənilir. Bu yenilik vasitəsilə istifadəçilər həm cihazın, həm də proqram təminatının hansı ilə aid olduğunu heç bir qarışıqlıq olmadan anlaya biləcəklər.
Hələlik Xiaomi tərəfindən rəsmi bir təsdiq gəlməsə də, “Digital Chat Station” kimi etibarlı sızdırma mənbələrinin bu mövzuda həmfikir olması iddiaların doğruluq payını artırır. Yeni Xiaomi 26 seriyasının və HyperOS 26-nın təfərrüatlarının yaxın aylarda rəsmən aydınlaşacağı gözlənilir.
