Gündəlik həyatımızın ayrılmaz hissəsinə çevrilən mobil taksi tətbiqləri arasında seçim etmək bəzən çətin olur. Çox vaxt sadəcə vərdişlərimizə və ya ekranda görünən ilk qiymətə əsaslanıb sifariş veririk. Bəs real vəziyyətdə, eyni anda və eyni məkanda hansı tətbiq daha sərfəli, sürətli və rahatdır?
Biz Bakıda taksi tətbiqlərinin müqayisəsi üçün nəzəriyyədən uzaqlaşıb, Dədə Qorqud parkından 28 Mall istiqamətinə doğru üç fərqli platformanı Yango, Bolt və 189 Taksi-ni canlı sınaqdan keçirdik. Qeyd etməliyik ki, bu test yalnız həmin saniyələrdəki reallığı və qiymət dinamikasını əks etdirən o anlıq bir təcrübədir.
Eyni ünvan, fərqli qiymətlər
Sınağımızın şərtləri çox sadə idi. 3 nəfər eyni nöqtədən eyni ünvana (28 Mall) “Ekonom” tarifində taksi sifariş edir. Sifariş düyməsinə basdığımız an fərqli rəqəmlərlə qarşılaşdıq. Bolt tətbiqi gediş üçün 3.20 AZN, 189 Taksi isə 3.30 AZN qiymət təyin etdi. Yango isə həmin dəqiqədə 2.50 AZN təklif edərək ən uyğun rəqəmi göstərdi və sistem avtomatik olaraq istifadəçiyə pulsuz “Comfort” sinfi üzrə avtomobil yönləndirdi.
İstifadəçi təcrübəsi
Maşınları gözləyərkən tətbiqlərin UX/UI xüsusiyyətlərini də nəzərdən keçirdik. Bolt maksimal minimalizm üzərində qurulub. interfeys sadədir və birbaşa sürətli sifarişə hesablanıb. 189 Taksi tətbiqində isə ənənəvi dispetçer xidmətinin rəqəmsal versiyası ab-havası hiss olunur. Yango isə daha geniş bir rəqəmsal ekosistem formalaşdırıb. Tətbiqin daxilində taksidən əlavə, ictimai nəqliyyatın izlənməsi və detallı xəritə naviqasiyası kimi müasir funksiyalar cəmləşib.
Hərəkətə başladıqdan sonra əsas fərqlər avtomobillərin komfortunda özünü göstərdi. Bolt sifarişi üzrə gələn “Chevrolet Cobalt” standart və problemsiz bir gediş təmin etdi. 189 Taksi-dən gələn mexanika sürətlər qutulu “Ravon” isə nisbətən səs-küylü və sərnişin üçün bir qədər narahat idi. Yango ilə yola düşən komanda üzvümüz isə təsadüfi “Comfort” yüksəlişi sayəsində yolu daha rahat başa vurdu. Vaxt baxımından isə hər üç iştirakçı demək olar ki, eyni dəqiqələrdə ünvana çatdı.
- Yekun ödənişlər isə belə oldu: 189 Taksi üçün 3.30 AZN, Bolt üçün 3.00 AZN, Yango üçün isə 2.50 AZN.
İnsanlar nə düşünür?
Təbii ki, bizim o andakı real təcrübəmiz mənzərənin yalnız bir hissəsidir. Buna görə də finiş nöqtəsində şəhər sakinlərinə yaxınlaşaraq onların da fikirlərini öyrəndik. Vətəndaşların cavabları əsasən iki böyük platforma Bolt və Yango ətrafında cəmləşirdi. Yekun xalda isə Yango daha öndə oldu. İstifadəçilərin bir qismi Yango-nun xəritə dəqiqliyini və geniş xidmətlərini, digər qismi isə Bolt-un sadəliyini vurğulayırdı. Bu da onu göstərir ki, hər platformanın istifadəçilərin ehtiyaclarına uyğun fərqli güclü tərəfləri var.
Aparılan bu canlı sınaq göstərdi ki, test etdiyimiz saatda Yango həm təklif etdiyi 2.50 AZN-lik qiymət, həm də “comfort” jesti ilə testimizin önə çıxan tətbiqi olsa da, nəzərə almalıyıq ki, bu platformaların hər biri real vaxt rejimində tələb-təklif əyrisinə (dynamic pricing) əsasən işləyir. Yəni, günün fərqli saatlarında, hava şəraitinin dəyişməsi və ya tıxac sıxlığı zamanı bu nəticələr fərqli ola bilər. Ən doğru addım isə sifariş anında ehtiyacınıza, o anki qiymətə və axtardığınız komforta uyğun olaraq düzgün tətbiqi seçə bilməkdir.
