Azərbaycan Prezidenti İlham Əliyev ölkədə rəqəmsallaşma, elektron hökumət, süni intellekt və innovasiya sahələrində fəaliyyətin daha da təkmilləşdirilməsi, eləcə də vahid dövlət siyasətinin həyata keçirilməsi məqsədilə yeni fərman imzalayıb.
Fərmana əsasən, bu istiqamətlərdə prioritetlərin müəyyənləşdirilməsi və innovasiya əsaslı iqtisadi modelə keçidin sürətləndirilməsi üçün Azərbaycanın Rəqəmsal İnkişaf Şurası yaradılıb.
Yeni yaradılmış Şuraya rəhbərlik Azərbaycan Respublikasının Birinci vitse-prezidenti Mehriban Əliyevaya həvalə olunub. Şuranın tərkibinə əsas dövlət və hökumət nümayəndələri, o cümlədən Prezidentin müvafiq sahələr üzrə köməkçiləri, rəqəmsal inkişaf və nəqliyyat, elm və təhsil, ədliyyə, maliyyə və iqtisadiyyat nazirləri, habelə Mərkəzi Bankın sədri və Dövlət Neft Fondunun icraçı direktoru daxil edilib.
Şuranın fəaliyyətinin gündəlik və operativ şəkildə təşkili məqsədilə xüsusi Katiblik formalaşdırılacaq. Fərmana əsasən, Katiblik funksiyalarının həyata keçirilməsi birbaşa Azərbaycan Respublikasının Rəqəmsal İnkişaf və Nəqliyyat Nazirliyinə tapşırılıb.
Qarşıya qoyulmuş hədəflərə çatmaq və vəzifələrin effektiv icrası üçün Şuraya geniş səlahiyyətlər verilib. Belə ki, qurum fəaliyyət prosesinə həm yerli, həm də xarici ekspertləri, elmi müəssisələri və beynəlxalq təşkilatları cəlb edə biləcək. Eyni zamanda, ayrı-ayrı layihələr və istiqamətlər üzrə dövlət qurumlarının və digər maraqlı tərəflərin iştirakı ilə xüsusi işçi qruplarının yaradılması nəzərdə tutulur.
Rəqəmsal İnkişaf Şurasının əsas vəzifələrinə dövlət proqramlarında öz əksini tapan tədbirlərin icrasına nəzarət etmək və qurumlararası siyasətin əlaqələndirilməsini təmin etmək daxildir. Həmçinin, Şura həyata keçirilən layihələrin strateji məqsədlərə uyğunluğunu yoxlayacaq və beynəlxalq təcrübə, habelə təşkilatların tövsiyələri nəzərə alınmaqla müvafiq qanunvericiliyin, yəni normativ hüquqi aktların təkmilləşdirilməsi istiqamətində addımlar atacaq.
Qeyd edək ki, Şura fəaliyyətinin şəffaflığı və hesabatlılığı çərçivəsində görülmüş işlər, əldə olunmuş nəticələr və gələcək planlar barədə ildə bir dəfə Azərbaycan Respublikasının Prezidentinə məlumat verəcək.
