Bəlkə də çoxlarınız üçün xaricə gedərək işləmək bu gün xeyli çətin görünür. Oturub fikirləşdikdə qarşınızda müəyyən problemlərin olduğunu və mövcud imkanlar daxilində hədəflərinizə çatmağın mümkün olmadığını düşünürsünüz. Lakin daim hədəflərinizə doğru lazımi vaxtda irəlilməyə çalışsanız, qarşınızdakı çətinlikləri görməzdən gəlib üzərinə getsəniz, hər yeni hədəfiniz sizi daha da yüksək pillələrə çıxaracaq. Bu məqaləmizdə sizlərə məhz hədəflərinə fokuslanaraq özünü daim inkişaf etdirən, illər ərzində bir çox tanınmış şirkətdə möhtəşəm karyera yaratmış Aygün Süleymandan və ötən gün ölkəmiz adına da nə qədər vacib bir uğura imza atdığından bəhs edəcəyik.
Dəyəri 26 milyard dollar dəyərində olan “Datadog” şirkətinin məhsul marketinqi üzrə vitse-prezidenti Aygün Süleyman kimdir?
Aygün Süleyman süni intellekt, innovasiya, blokçeyn, rəqəmsal transformasiya, müştərilərlə əlaqələrin idarəetməsi sistemləri və məhsul inkişafının idarə edilməsi sahələrində artıq 10 ildən çoxdur fəaliyyət göstərməkdədir. 2006-cı ildə maqistr dərəcəsində Azərbaycan Dillər Universitetində İngilis, Amerika ədəbiyyatı sahəsində öz təhsilini bitirib. Daha sonra Amerikaya yollanan həmyerlimiz 2010-cu ilə qədər Amerikanın Barry Universitetində biznesin idarə edilməsi ixtisası üzrə özünü inkişaf etdirərək işləməyə başlayıb.
ProcessMAP Corporation şirkətində korporativ strategiya məsləhətçisi kimi 2010-cu ildən başladığı işində illər ərzində dayanmadan yüksələn Aygün Süleyman, 2014-cü ildən Progress şirkətində məhsul marketinqinin rəhbəri olmuşdur. Təbii ki, bununla qalmayıb dünyaca məşhur Salesforce şirkətində karyerasını davam etdirməyə başlayan həmyerlimiz 2020-ci ildə həmin şirkətin marketinq və süni intellekt məhsulları üzrə baş direktoru olmuşdur.
Bəli, bundan sonra daha yüksək pillələri hədəfləyən Aygün Süleyman əvvəlcə SetSail şirkətinin marketinq üzrə vitse-prezidenti olub. 2022-ci ilin yanvar ayından etibarən isə ötən il gəliri 1 milyard və təkcə bu ilin birinci yarısı 1.4 milyard olan Datadog şirkətininin marketinq üzrə vitse-prezidenti olaraq işə başlayıb. Ötən gün Datadog şirkəti tərəfindən keçirilən ilin ən böyük konfransında isə Aygün Süleymanın tədbir əvvəlindəki çıxışı Azərbaycan adına qürur verici bir diqqət çəkib.
2010-cu ildə təsis edilən Datadog şirkəti SaaS (proqram təminatı xidməti) əsaslı məlumat analitikası tətbiqi ilə serverlərin, verilənlər bazalarının, şirkət servislərinin və xidmətlərin monitorinqini təmin edir. Google Cloud Platform, Microsoft Azure, AWS, Red Hat OpenShift kimi nəhənglərin inteqrasiya olduğu bu Datadog platforması təkcə bu ilin ilk 6 ayı ərzində 1.4 milyard dollar gəlir əldə edib. Bu ilin sonuna qədər bu rəqəm sadəcə 2 milyard dolları keçsə, şirkətin gəlirinin Azərbaycanın illik gəlirinin 1/8 və ya 1/9 hissəsinə bərabər olması deməkdir. Uyğun olaraq şirkətin dəyəri isə 26 milyard dollar təşkil edir.
Məhz bu şirkətin hər il keçirdiyi ən böyük konfransda isə girişdə 5 dəqiqəlik CEO (baş icraçı direktoru) və CTO (texnologiyalar rəhbəri) çıxışlarından dərhal sonra mikrofon Aygün Süleymana ötürülüb. Həmyerlimiz isə, şirkətin DASH 2022 konfransındakı göstərəcəyi detallardan danışıb. Həmin çıxışa aşağıdan baxa bilərsiniz.
