Son dövrlərdə WhatsApp vasitəsilə “toy dəvətnamələri”nin göndərilməsi adi hala çevrilib. Bundan istifadə edən hakerlər xüsusi dəvətnamələr ilə smartfonları sındırmağa başlayıblar. Bundan qorunmaq üçün tanımadığınız insanların heç bir faylını açmayın.
WhatsApp vasitəsilə “toy dəvətnamələri”nin göndərilməsinin adi hala çevrilməsi əslində texnologiyanın inkişafı və bu prosesin asan hala gəlməsi nəticəsində baş verib. Lakin görünür ki, bu, hakerlər tərəfindən yeni bir tələ metoduna çevrilib. Tamamilə normal dəvətə bənzəyən toy dəvətnamələrində hakerlərin smartfonunuza tam nəzarət etməsinə imkan verən zərərli proqramlar ola bilər. Belə ki, sadə bir fayl əlavəsi (APK) toy dəvətnaməsi kimi göndərilir. Onu yüklədiyiniz zaman telefonunuza zərərli proqram quraşdırılır və siz hakerlərə uzaqdan giriş icazəsini özünüz verirsiniz. Bu o deməkdir ki, artıq faylı açdıqdan sonra bütün məlumatlarınız oğurlanmış olur.
Sözügedən dəvətnamələr adətən naməlum nömrələrlə göndərilir. Buna görə də əvvəlcə nömrəni və göndəricini yoxlamaq lazımdır. Əslində bu tələyə düşməmək üçün bəzi sadə məlumatlara yiyələnməyiniz kifayət edir. Zərərli toy dəvətnamələri çox vaxt böyük ölçüdə olur və faylın endirilməsini tələb edir. Ona görə də adi bir istifadəçini aldatmaq çətindir, lakin bu gün WhatsApp ən çox yayılmış ünsiyyət vasitəsidir və bütün yaş səviyyələrində insanlar tərəfindən istifadə olunur. Bu səbəbdən hakerlərin qurbanı olanların sayı da az deyil.
