Arxeoloqlar tərəfindən tarixdə ilk dəfə 800 illik Skandinav əfsanəsində adı çəkilən insanın skeleti tapılıb. Beləliklə, əfsanələrin əslində həqiqətən də keçmişdə baş verməsi ehtimalı bu hadisə birlikdə əhəmiyyətli səviyyədə artıb.
1184-1202-ci illər arasında Norveç kralı Sverre Sigurdsson-un dövründən qalma Sverris əfsanəsi “Ölü götürüb quyuya atdılar, sonra quyunu daşla doldurdular” mövzusu ilə məşhurdur. Burada quyuya atılan və daşlarla örtülmüş bir ölüdən bəhs edilir. Arxeoloqlar “Quyu adamı” kimi tanınan adamın əslində mövcud olduğuna dair sübutlar tapıblar. Skandinaviya, İslandiya və İrlandiyadan olan tədqiqatçılar qrupu əfsanədə təsvir olunan quyudan çıxarılan skeleti tədqiq edərkən maraqlı nəticələrlə qarşılaşıb. İlk dəfə 1938-ci ildə aşkar edilən skelet müasir üsullarla tədqiq edildikdə əfsanə öz təsdiqini qismən də olsa tapıb.
Norveçin Trondheim şəhərindəki Sverresborq qəsrinin köhnə su quyusunda yerləşən bu skelet müasir genetik analizlə araşdırıldıqda tarixdə ilk dəfə bir əfsanə ilə real tarixi hadisələr elmi cəhətdən uyğunlaşdırılıb. Bu adamın 1197-ci ildə katoliklərin işğalı zamanı öldürüldüyü və su təchizatını zəhərləmək üçün işğalçılar tərəfindən suya atıldığı güman edilir. Genetik analiz nəticəsində məlum olub ki, Quyu Adamı çox güman ki, 30-40 yaşları arasında açıq qəhvəyi və ya sarı saçlı, mavi gözlü və Norveçin cənubundakı Vest-Agderdən olan kişidir. Bu işdə ölkənin ətraflı genetik xəritəsi, müasir gen analizi üsulları və karbon testlərindən istifadə edilib. Araşdırmanı aparan genetik alim Martin Ellegaard tarixi mətnlərdə və əfsanələrdə ilk dəfə adı çəkilən şəxsin fiziki olaraq tapılmasının vacib olduğunu bildirib.
